Kan thlen chin hi beisei phak bak a ni - Vardy

Leicester City striker Jamie Vardy chuan tun season-a an club chet ṭhat dan chu a beisei phak bak a nih thu a sawi chhuak.

Kar liamtaa contract pawtsei Vardy chuan, "Kan thlen chin hi a tak ngei a ni tih hriat nan keimah leh keimah hi ka insik fo, tuna table hmahruaitu kan nih hi awih a harsa ṭhin. Amaherawhchu thudik tak sawi chuan tuna kan thlen chin thleng tur hian kan thawkrim a ni," tiin a sawi.

Vardy hian kum 2012 khan Fleetwood aṭangin Leicester hi a zawm a, tun season-ah goal 18 zet khung tawhin Premier League top scorer a ni mek. Kum 29-a upa Vardy hian tun hmain kar khatah £120 a hlawh ṭhin a, tunah chuan £80,000 a hlawh tawh.

A beisei phak aia sang a thlen tawh thu sawiin Vardy chuan, "Halifax-a ka awm lai khan Conference pawh ka khelh phak ka ring ngai lo. Conference club Fleetwood ka zawm hnuah Leicester ka zawm theih hi ka ring lo a, England tana khelh phei chu ka beisei pha ngai lo. Khatih hunlai khan kum nuai chuang pawh dam ila tuna ka thlen chin hi ka thlen ka ring lo," a ti.

Leicester striker Vardy chuan, "Player ṭhenkhat chuan football hi an eizawnna ang chauhin an sawi ṭhin a, ka tan chu chumi piah lam chu a ni. Tuna ka thlen chin thleng tur hian ka theihna zawng zawng ka chhuah a, minute tin hi nuam ka ti a, tun dinhmuna awm reng tur hian theihtawp ka chhuah zel ang," tiin nuam ti chunga a thawhrim thu a sawi.