Chile chuan sorkar laka lungawi lohna lantirtu-ten tharum thawh an la chhunzawm zel avangin Pathianni khan state of emergency an puan tawh chu a pawtsei.

Public transit fare tih­san duh lohna lantira nawrh huaihawt hian ziaawm lam a pan thei lo a, mi pathum an thih tawh bakah mi 716 an man tawh. An ram khawpui Santiago-ah nawrh hi huaihawt hmasa berin hei hian khawpui dang a kangkai a, rampumah duh lohna lantirna hi neiin buaina hrang hrang a chhuak zui a ni.

Emergency pawhsei hian Santiago bakah hian Coquimbo, Valparaiso leh Metropolitana-te pawh a huam.

Chilean president Sebas­tian Pinera chuan Zirtawpni liam ta khan Santiago-ah emergency puan a nih thu a sawi a, heihi duh lohna lantirtuten metro station an hal vang a ni. Inrinni khan buaina chhuak vangin hmeichhe pahnih leh mi pakhat an thih leh tak avangin emergency hi an pawtsei leh a ni.

Duh lohna lantirtu zinga pahnih chu sipaiten an kap bawk a, an dinhmun a ṭha lo hle nia tarlan a ni bawk. Ramchhung hmun hrang hranga nawrh huaihawtnaah hian civil mi 15 leh police officer 61 an hliam tawh. 

Santiago-a metro station eng emaw zat chu a kan bakah nawrh huaihawtten an khawih chhe nasa hle a, nimin thleng khan school eng emaw zat chu an khar.

Chilean minister of national defense Javier Iturriaga chuan Inrinni khan hnathawh tur a la tam hle tih sawiin, Thawhṭanni aṭang chuan hna chhunzawm a ni leh thei dawn tih sawi bawk mah se emergency hi pawhsei a ngai leh ta a ni.

October 6-a sorkarin Santiago Metro fare a tihsan hnu lawk khan nawrh hi ṭan nghal a ni a, hemi hnu lawk hian fare tihsan hi Sebastian Pinera chuan a sut lehnghal a, mahse nawrh hi an huaihawt chhunzawm tho a ni. 

Share this Post