Vanglaini - Indonesia President atan Joko Widodo lalut leh

KHAWTHLIR

Thisen pe

Champhai police-te chuan nimin khan Police Commemoration Day pualin Champhai District Hospital-ah blood donation camp an huaihawt a, district SP Rex Zarzoliana hoin thisen unit 19 an pe a, petute mipa 18 leh hmeichhia pakhat an ni.

Thutlukna siam lo

Zoram Medical College (ZMC) chu society anga awm zel tur nge, state sorkar hnuaia awm tur tihah Health department chuan thutlukna a la siam lo. Thu dawn danin, ZMC society anga awm tur nge, state sorkar hnuaia awm tur tih zirchiang tur committee din a ni a, committee chuan sorkarah report an thehlut tawh. Report-ah chuan thutlukna mumal an siam lo a, chuvang chuan Chief Minister hoa thutlukna siam a ni ang.

License siamtir turin hriattir

Lunglei DC chuan, Lunglei district-a airgun nei zingah license/certificate la siamtir lo leh nei lo mi eng emaw zat an la awm tih hriat a nih thu a tarlang a; airgun neite chu a kah nat zawng azirin October 28-31, 2019 chhungin arms license/certificate siamtir vek turin a hriattir. Arms license/certificate nei loa airgun kawlte chu mansak leh thubuai siamsak theih an nih thu tarlangin, "Sorkar thu zâwm loa arms license/certificate nei loa airgun kawlte chu an silai mansak leh Arms Act, 1959 Section 24&25 angin thubuai siamsak theih an ni," a ti.

Kawng khar dawn

Traffic SP chuan thupek chhuahin PHE dept. hnuaia Aizawl Water Distribution Division North chuan October 21, 2019 aṭangin Durtlang Leitan leh Synod Hospital, Durtlang inkar kawngah pipe phum hna an thawh dawn avangin helai kawng hi hnathawh zawh hma chu khar a nih dawn thu a tarlang. Hnathawh chhung chuan Presbyterian English School peng aṭangin motor inherna lamah lirthei te tlan vek tur a ni.

Candidate pahnih

Mara Autonomous District Council (MADC)-a Tokalo MDC constituency by-election neih turah returning officer Bhupesh Chaudhary, district bawrhsap hnenah mi pahnihin nomination an thehlut. Hming pe lutute hi BJP aṭangin M Laikaw leh MNF aṭangin Chotha Hlychho te an ni a; vawiin tlai dar 3 thleng inhnuhdawhna hun hawn a ni ang.

DAWNTISEI

Indonesia President atan Joko Widodo lalut leh

Indonesia President nilai Joko Widodo chu a term hnihna turin Pathianni khan Jakarta-a Parliament building-ah President atan lakluh a ni leh ta.

President duhdan angin lakluh inkhawm hi a hautak lo thei anga neih a ni. Lakluh a nih hmasaka parade ropui tak neih te, sakawr tawlailir hmanga Jakarta fankualpui a nih ang chu a ti nawn tawh lo.

Lakluh a nih hma lawka thuthar thehdarhtute a kawmnaah, Widodo chuan "A vawi hnihna a ni dawn ta a, kan vai hian kan ram hmasawnna atan hian kan thawk ho vek tur a ni. Cabinet turte pawh thlan fel a nih tawh a ni," a ti.

President lakluh inkhawma telpui tur hian khawthlang ram leh Asia ram hruaitu eng emaw zat an tel. An zingah hian Australia prime minister Scott Morrison leh China vice president Wang Qishan te pawh an tel a ni. US President Donald Trump chuan a aiawh turin Secretary of Transportation Elaine Chao a tir.

Indonesia President term hnihna chelh thei, kum 58 mi Widodo hi Indonesia President thlantlin tawha mi hausa tawntaw ni lo, politician lar chhungte nei hran lo, eiruk thubuai neilo leh sipai lama background nei lo thlantlin hmasak ber a ni. A president term hmasa chhung khan Indonesia ram hmasawnna atan hian a thawh hlawk hle a, infrastructure lamah hma a sawn pui hle a ni. Retheihna chungchangah pawh an ram hi a chawikang sawt hle bawk. An ram mipuite rilruah pawh a tla nain a lar hle.

Widodo rual hian a vice president Maruf Amin pawh lakluh nghal a ni bawk. Amin hi Indonesia rama Islamic leaders council, Majelis Ulama Indonesia chairman nilai leh, khawvela muslim organization lian ber, Nahdlatul Ulama-a supeme leader a ni.

Share this Post

Login to comment

No Comments