Israel PM-in Palestinian politician-te hrem a duh

Israel Prime Minister Benjamin Netanyahu chuan Parliament-a Palestinian member, sorkar thupek palzutte hremna tur dan siam a rawt.

Israel mite chunga pawikhawihna thlentu, Palestinian chhungte chu tunhnaiah Parliament-a Palestinian member pathum - Hanin Zoabi, Bassel Ghattas leh Jamal Zahalka-te chuan an tlawh a, hei hian PM hi a ti lungawi lo hle.

Pathianni-a cabinet meeting neihah PM hian sorkar thupek palzuttu member-te hremna siam hi a rawt a, he bill hi pawm a nih chuan dan bawhchhetu roreltute chu Parliament member an nihna hlihsak theih an ni ang.

Israel court chuan Zaobi-i hi thubuai hranah public official-te chunga mawi lo taka a chet avangin thla ruk chhung tang tur leh, Israel shekel 3,000 chawi turin alo hrem tawh bawk. Kum 2014 khan Nazareth khuaa nawrh huaihawt ṭumin, Zoabi-i hian Arab police officer-te chu 'phatsantu' tiin a lo aukhum tawh a ni.

Netanyahu leh Parliament speaker Yuli Edelstein-te chuan pawikhawihtu, Palestinian mi chhungte an tlawh avangin Zaobi, Ghattas leh Zahalka-te lakah complain hi Ethics Committee hnenah an lo thehlut tawh a ni. Netanyahu chuan, "Israel mipuite chuan heng mite hi an aiawhtuah an ngai thei dawn lo a ni. Israel society-a Arab mite telh an nih theihna atan hian theihtawp kan chhuah a, mahse roreltu pathumte chet dan hian inhuatna a thlen tir zawk a ni" a ti.