Syria ramah refugee camp thar siam belh

Syria tualchhung indona thleng avanga Turkey rama raltlan lut an pun chak em vangin Turkey chuan a ramri a khar a, hei vang hian ramri bula raltlan tam tak tangkhangte tan camp siam a ni.

Turkey ramah hian Syria ram aṭanga raltlan maktaduai 2.5 vel an awm mek a, raltlan an luh belh zel avangin Turkey hian tunhnaiah a ramrite a khar a ni. Europe hruaituten ramri hi hawng turin ngen mah se a la hawng duh rih lo. Ral≠tlan tam tak chuan Europe luh tumin Turkey hi an pan hmasa ṭhin a ni.

Turkey Deputy Prime Ministr Numan Kurtulmus chuan, "Turkey chuan raltlan a enkawl theih chin aia tam a dawng tawh a, hetichung hian kan lakluh belh reng a ni" a ti.

Kar kaltaa Aleppo biala Syria sipai leh Russia-ten helho laka beihpui an thlak avangin kar hmasa chhung khan he biala cheng mi 35,000 vel chu tlanchhiain, Turkey rama luh tumin ramri-ah hian an inkhuar mek.

Turkish Humanitarian Relief Foundation chuan Syria ram china awm, raltlante tan hian camp an siamsak bakah, ei tur leh damdawi≠te an theih angin an pe reng tih an sawi.

Turkey President Recep Tayypi Erdogan chuan a ṭul a nih chuan Syria raltlante tan hian ramri an la hawng dawn tih a sawi. Hetihlai hian EU foreign policy hotu Federica Mogherini chuan Turkey chuan raltlante himna ngaihsak chu a tih tur a ni tiin, "EU pawhin raltlante lo dawnsawnna tur hian
ṭanpuina sum pawh a pe a ni" a ti. Nikum November thla khan EU chuan Turkey rama Syria raltlan awmte enkawlna tur hian dollar maktaduai 3.3 pe turin inremna an lo siam tawh a ni.

Kum 2011-a Syria tualchhung indona a thlen aṭang khan himna zawngin mi maktaduai 4.6 vel chuan Syria ram an chhuahsan tawh. Indona tuartu mi makta≠duai 13.5 chu chhawmdawlna pek ngaiin an awm mek bawk.

Kar kalta khan donor ram 60-te chuan London-ah meeting niin, Syria mipui, indona avanga harsatna tawk mek leh ramdanga himna zawnga tlanchhiate ṭanpuina tur sum tam tham tak pek an rel.