March 17-ah Myanmar President thlang dawn

9th February, 2016

Myanmar Union Parliament chuan an ram president thar tur thlan hun atan March 17 ruat a nih thu nimin khan a puang.

President thar tur thlannaah hian candidate pathum an awm dawn a, candidate tur hi Lower House, Upper House bakah sipai aiawhten pakhat ṭheuh an nominate ang. Nomination list hi union parliament chairman hnenah an pe dawn a ni.

Candidate pathum zinga vote hmu sang ber chu President a ni ang a, a dang pahnih chu vice-president ah dah nghal an ni ang.

Nikum November thlaa inthlanpui neihah khan Aung San Suu Kyi-i party, National League for Democracy (NLD) chu hneh taka thlan tlin niin, parliament-ah majority a nei pha a ni.

Kar kalta Thawhṭanni khan Parliament thara Lower House, House of Representatives chuan session hmasa ber neiin, Nilaini khan Upper House, House of Nationalities session neih a ni. State or regional parliament session hmasa ber chu nimin khan state hrang hrangah neih a ni bawk.

Lower House Speaker atan NLD member U Min Myint chu thlan a ni a, deputy speaker atan sipai thlawp party,Union Solidarity and Development Party (USDP) member U Ti Khun Myat thlan a ni. Upper House speaker atan NLD member U Mann Win Khaing Than leh, deputy speake atan Arakan National Party (ANP) member U Aye Tha Aung-te an thlang.

Inthlanpuiah NLD-in hnehna chang mah se, sipai sorkar hnuaia an ram danpui siama Article 59 (f) ah ramdang mi nupui pasal nei leh, an laka fa nei chu an ram president-a dah khap a ni a, hei vang hian NLD hotu, Suu Kyi-i pawh a pasal, British mi nen fapa pahnih an neih vangin President dinhmun hi a chuh thei dawn lo a ni. Mahse NLA hian parliament-ah majority an neih phak avangin thuneihna an lak hunah he dan hi thlak danglam ngei an tum dawn a ni. .

Suu Kyi-i chuan President dinhmun hi luah thei rih dawn lo mah se, a phen aṭangin an ram kaihhruai hna chu a thawk dawn tih alo sawi tawh. Article 59(f) hnawl a nih theih dan tur hi sipai hotu lu pawh a sawipui tawh a ni. He dan hi hnawl tur chuan Parliament-ah member hmun thuma
ṭhena hmun hnihin an thlawp a ngai dawn a, sipai hian parliament seat 25% a la chan avangin NLD hian an puihna hi a mamawh dawn a ni.