Chile president Sebastián Piñera chuan kar kal ta Zirtawpni zan khan an ram khawpui Santiago-ah ni 15 chhung atan emergency a puang. 

Sebastián Piñera hian emergency a puan bakah, an ram sipaite chu buai­na hmuna venhim hna thawk turin a hriattir. National defense head atan Major General Javier Iturriaga del Campo chu a ruat nghal bawk a ni.

Emergency puan a nih chhan hi metro ticket man tihsan avanga, mipui lungawi lote'n nawrh an huaihawt vang a ni. Emergency puan vang hian mipui punkawm phal a ni lo a, tunkara inkhel turte pawh tihtawp lailawk a ni bawk.

"Kan khawpui Santiago a remna leh muanna a awm theihnan emergency hi kan puang a ni," tiin Piñera hian thuchhuah a siam.

Khawpui hmun ṭhenkhata metro station-te beih a nih avangin leihnuai inkal­pawhna (subway)-te khar a ni a, metro station 78 chu a hmun leh hma tih­chhiat a nih thu thuneitute chuan an sawi. 

Mi 133 man an ni a, metro station-a an thil tihchhiat hlut zawng hi $700,000 hu a ni.

Metro chuan man hi $1.13 aṭanga $1.17-a tihsan a ni a, a tir chuan duh lohna hi zirlaiten an lantir hmasa a, a hnuah mipuiin zirlaite hi an thlawp a ni. Metro chuan man tihsan chhan hi thuneitu lam chuan oil man tihsan a nih vang leh an ram pawisa peso hlutna tlakhniam vang a ni, an ti. 

Share this Post