Vanglaini - Afghanistan-ah firfiak 12 that, khaw 16 lalet

KHAWTHLIR

B grade hmu

National Assessment and Accreditation Council (NAAC) chuan Kolasib College chu B grade accreditation an pe. NAAC hian October 3-4, 2019 chhung khan second cycle atan Kolasib College an endik a, endikna report NAAC hmunpuia an thehluh hnuah, NAAC chuan B grade a hlan ta a ni. Kolasib College hian kum 2006 khan C++ grade a lo hmu tawh bawk.

Thawhpuiah sáwm

Sports minister Robert Romawia Royte chuan MLA zawng zawng hnenah lehkha thawnin, December 9-13, 2019 chhung MLA constituency wise-a Mizoram State Games 2019 neih turah an biala Constituency Level Committee Chairman atan ruat an nih thu leh, tlawmngaih chhuaha chairman nihna chu pawm a, ṭhalaite'n infiamna lama hma an sawnna atan thawhpuiah a sáwm.

IKK inkhawmpui

Isua Krista Kohhran (IKK), Vaivakawna hmunpui neite chuan an kohhrana rorelna sang ber dawttu, Division Inkhawmpui chu October 18, Zirtawpni khan hmun hrang hrangah an hmang ṭan a, nizan khan a ṭiak. Division inkhawmpui hi Assembly dawta rorelna sang ber a ni a, nimin chawhma inkhawmah kohhran upa nemngheh inkhawm an hmang a ni.

Choir Convention

Bible Society of India (BSI), Aizawl Auxiliary hnuaia Youth Committee chuan October 19-20 chhung khan Mission Vengthlang Presbyterian Kohhran biak-inah Choir Convention an buatsaih. Convention-ah hian Aizawla zaipawl hrang hrangte an tel a, Pathian fakna hla an rem a ni.

Nauhual Ni

Mizoram Presbyterian Kohhran chuan nimin chawhma khan Nauhual Ni an hmang. Nauhual ni-ah hian kohran hrang hrangah an kohhran chhunga nautête chu Beginners pawla lut rual an nih huna an inziah luh ngei theih nan hual lâwk an ni. Nau hual hi kum 1940 khan an chíng ṭan nia sawi a ni.

Lehkhabu tlangzarh

Lalsangzuala, MZU Mizo department-a associate professor lehkhabu ziah, 'Vantirhkoh Mittui' tih leh 'Duhmanga leh Dardini' tih chu Inrinni khan IPR director Lallianpuii'n MZP Conference Hall-ah a tlangzarh.

DAWNTISEI

Afghanistan-ah firfiak 12 that, khaw 16 lalet

Afghanistan hmarlama Baghlan province-ah nimin khan sipaiten beihpui an thlak a, Taliban firfiak 12 an thah bakah thingtlang khaw 16 chu firfiak kut aṭang hian an lalet bawk.

Sipai thupuangtu Abdul Hadi Jamal chuan nimin khan hemi chungchang hi sawiin, ni li kal ta chhung khan Taliban firfiakte lakah hian beihpui an thlak tawh a, Dand-e-Ghori, Dand-e-Shahabudin leh Kilagai area-a thingtlang khaw 16 zet chu firfiak kut aṭang hian an chhuhsak tawh a ni.

Firfiak an thah 12 bakah hian 24 vel chu an hliam bawk a, hliam zingah hian an commander Qari Bakhtyar pawh a tel a, ani hi Baghlan province-a shadow deputy governor anga awm mek a ni bawk.

Hetihlai hian Taliban thlawptu lam pawl thupuangtu Zabihullah Majahid chuan sorkar thuchhuah hi an pawm lo tih sawi thungin, security force-te beihpui thlak chu a hlawhchham tih a sawi.

Baghlan province khawpui Pul-e-Khumri hi Kabul aṭanga km 160 vela hlaa awm niin, kum eng emaw zat chhung chu firfiakten nasa takin pawikhawihna an thlen tawh a ni.

Share this Post

Login to comment

No Comments