UK Parliament-in Johnson-a Brexit deal hnawl

United Kingdom (UK) Parliament chuan European Union (EU) aṭanga Britain inlakchhuahna tura prime minister Boris Johnson leh EU-in inremna an siam chu a hnawl. 

PM Jonhson chuan EU hruaitute nena Brussels-a inremna an siam hi Inrinni khan Parliament-ah a pharh a, mahse House of Commons-ah vote lak a nih hnuah, inremna an siam tawh hi siamṭhat leh duh lamah MP 322-in a vote a, inremna siam sa thlawp lamah MP 306-in an vote thung. 

House of Commons-in Brexit deal a hnawl avang hian, Johnson chuan MP-te ngenna angin EU chhuahsan an tum hun, October 31 pawh pawhsei sak leh turin a ngen leh nghal a ni. Ngenna a siam rual hian ama mimal chuan hun pawhtlai leh hi a duh lo hle tih a sawilang nghal a, hei vang hian a ngenna thawnah hian a hming pawh a sign duh lo nia sawi a ni. Johnson hian a hmain inremna an siam thei lo a nih pawhin October 31-ah chuan EU chu an chhuahsan dawn tho tiin a lo sawi tawh a ni. 

Eptu lam chuan PM Johnson chu dan chunga leng anga inngaiah an puh a, Parliament leh Court-te chu a mimal duh dan anga hruai tumah an puh. EU hnena ngenna a thawna a hming a sign duh lo chu na takin an sawisel. 

EU chuan Parliament-a Brexit deal hnawl a nih leh tak avangin, Britain sorkar hnenah eng angin nge Brexit chu kalpui a tum dan sawichiang thuai turin a ti bawk.



Share this Post

Login to comment
No Comments