Ecuador sorkar-in UN ṭanpuina dil

Ecuador-a fuel man tihsan avanga nawrh huaihawtte'n buaina an tih punlun zel avangin, an rama ralmuanna a awm theih nan Ecuador sorkar chuan UN hnenah ṭanpuina a ngen. 

Ecuador Foreign Ministry chuan nawrh huaihawtten buaina leh harsatna hrang hrang an siam avangin, UN chu an ram ṭanpui tura a sawm thu thuchhuah an siam.

Ecuador sorkar chuan October 1 aṭang khan petrol leh diesel man hi a tisang chho a, hemi duh lohna hi an khawpui Quito-ah lantirin, kal kawngte pawh dan a ni a, thingkungte chu halin, hmun hrang hrangah buaina a chhuak nual a ni. 

October 3 khan an Ecuadorian President Lenin Moreno chuan an ram pumah ni 60 chung atan emergency a puang. Buaina leh mipuite himna ven­thawnnan emergency hi a puang a ni. Moreno chuan kan ram economy-a sum indaihlohna a nasat avangin, petrol leh diesel man hi tihsan chho a ni, a ti.

Presidential thupuangtu Juan Sebas­tian Roldan chuan nawrh huaihawtte zinga mi 570 chu man an nih thu a sawi. Ministry of Energy and Non-renewable Resources chuan nawrh huaihawt a nih avang hian oil barrel 165,000 chu hlauh a nih thu an tarlang. 

Huaihawttuten Parliament bei

Ecuador-a nawrh huaihawtte chu Thawhlehni khan National Assembly building-ah lutin police-ten tear gas nen an hnawt darh.

President Lenín Moreno chuan duh lohna lantirtute leh security force-te parliament-a an innawr buai hnu hian zan lam curfew a puang zui bawk. 

Nawrh huaihawtte hian Thawhlehni khan thing phaw (wooden shield) kengin National Assembly building-a security force-te hi an tawn tlang a, building chhunga an luh hnu hian flag-te vaiin 'slogan'-te an aupui zui a ni. Hemi hnu hian security force lam hian tear gas nen an hnawt darh zui bawk. Nawrh huaihawtte parliament building-a an luh lai hain staff pakhat mah an awm lo niin an sawi.

Parliament mai bakah hian sorkar building dang pawh beih a ni a, thil chhia pawh a tam hle a ni.




Share this Post

Login to comment
No Comments