Zirnaa MNF sûlhnu a tam - MNYF President

Mizo National Youth Front president Dr L Thangmawia chuan, zirna lamah MNF aia sorkarna chang rei party-te sûlhnu aiin MNF sorkar sûlhnu a tam zawk niin a sawi.

Dr L Thangmawia hian nimin khan Aizawl Press Club-a thuthar thehdarhtute a kâwm a; "MNF-in sorkarna a chan apiangin zirna a ngaih pawimawhzia a lang fo tawh. MNF aia sorkarna chang rei party-te aiin education-a a sûlhnu hi a tam lawr lak. MNF sorkar term thum (1998-2003, 2003-2008 leh 2018-2023) chhung hian sikul 466 provincialise niin, sikul 259 adhoc grant-in-aid ah hlan kai a ni a, sikul 404 lumpsum grant-in-aid ah hlan kai a ni," a ti.

Congress sorkar kum 10 chhungin sikul pakhat chiah provincialise a nih thu leh kum 2008 inthlan puan dawn hnaiah HSS 43, H/S 25 leh M/S pasarih lumpsum grant-in-aid ah an hlàn kai ve hrâm thu L Thangmawia chuan a sawi.

Mizoram University campus turah MNF-in hma an la nasa nia sawiin Thangmawia chuan, "January 2020 khan central sorkar HRD-in notification tichhuakin department 13 hawng turin a remti a, a hmun tur pawh Pukpui ramah tihfel a ni. MZU-in DPR cheng vbc. 400 chuang siamin central-ah a thawn a, Covid avangin Finance Ministry-in a la tifel thei rih lo," a ti.

MNYF TARLAN ṬHENKHAT

* Sorkar sikulah uniform inang hman a ni.

* Raltlan naupang Myanmar aṭangin 6,366, Bangladesh aṭangin 250 leh Manipur aṭangin 2,547, an vaiin zirlai 9,190-te a thláwnin uniform leh zirlaibu pek a ni.

* Hindi zirtirtu 818 lak a ni a, a nghetin zirtirtu 152 leh MR-in 880 lak a ni. Samagra hnuaia thawk mi 5,537 hlawh tihpun a ni.

* H/S zirtirtu 50 lak tura tihfel a ni a, HSS lecturer leh elementary school zirtirtu eng emaw zat regular-a lak turin hmalak mek a ni.

* Sikul hrang hrangah SEDP zirtirtu 1,000 dawn an thawk mek.

* Centre 40-ah Grassroot Sports Development Programme kalpui mek a ni.

* NAAC assessment-ah India ram state zawng zawngah Mizoram chu 83% niin a sang ber.

* RIPANS tihchangtlunna tur cheng vbc. 481 nawr chhuah a ni.

* ZMC chu June 16, 2023-ah National Medical Commission-in recognition a pe.