White House chuan Democrats lam thunun, House of Representative-in President Donald Trump-a paihthlak dan kawng zawnga a chhuichian hna a kalpui mekah a thawhpui dawn lo tih a sawi.
White House Counsel Pat Cipollone chuan House Speaker Nancy Pelosi hnenah lehkha thawnin, Trump chhuichian hna an kalpui dan chu an ram dan leh Constitution kalh a ni tih a sawi. America mipuiten president atana an lo thlan chhuah tawh chu an pawmpui thei lo a, kum 2016 inthlan result chu an pawm lo tih sawi tlang mai turin a ti.
Nancy Pelosi hian September 24 khan President Trump hi Ukraine president Voldymyr Zelensky nen an inbiak danah chhui chian a ni dawn tih a lo puang tawh a ni.
Whistleblower (CIA agent nia sawi) chuan July 25-a President Trump-an Ukraine president Zelensky a biak khan, nakkuma US president thlanna neih tura Democrats presidential candidate beiseiawm ber, Joe Biden leh a fapa Hunter Biden-te chungchang chhui chiang turin a hrilh niin a sawi. Trump chuan a ngenna hi a zawm loh chuan US-in Ukraine sipai chhawmdawlna a pek ṭhin pawh hreksakah a vau zui niin a sawi bawk.
He thil thleng vang hian Democrats lam chuan Trump chhuichian hna hi kalpui turin hma an la zui ta a ni.
Hetih lai hian president Trump chuan a chungchang chhui a nih dan chu America mipuite laka pawikhawihna a ni tiin, Ukraine President nen chuan inbiakna hun ṭha tak an neih thu leh, a ṭul a nih chuan Schiff leh Pelosi mai ni lo, midangte pawh an inkawm dan chungchang hrilh a, a thawhpui theih vek thu a lo sawi tawh.
Pat Cipollone-a lehkha hi impeachment inquiry buaipui mektu, House Intelligence Committee Chairman Adam Schiff, Oversight and Reform Committee Chairman Elijah Cummings leh Foreign Affairs Committee Chairman Eliot Engel te pek an ni bawk.
Login to comment
No Comments