Portuguese prime minister Antó­nio Costa kaihhruai Socialist party(PS) chuan Pathiannia an ram inthlanpuiah hnehna an chang leh.

Vote chanve aia tam chhiar tawhah Socialist party hian 36.65% an hmu tawh a, an khingpui ber centre-right Social Democrats (PSD) chuan 27.9% hmu tawhin an dawt a ni.

Socialist party-ten vote an hmuh tawh zat hi 2015 inthlanpui an neiha an vote share aiin a tam tawh a, vote chhiar zawh a nih hunah phei chuan a la pun nasat lehzual rin a ni.

Vote chhiar tawh chin aṭanga a lan danin PS hian seat 230 awmna parliament-ah seat 106 chu an la chiang tawh a, seat 10 an lak belh leh chuan majority an hmu thei ang. Tunah hian party tenau zawk pahnih nen ṭangkawpin sorkarna an siam mek a, an vote hmuh tawh dan aṭang hian sorkarna an siam leh thei dawn tih a chiang tawh bawk.

Portugal-ah hian vote thlak thei mi maktaduai 11 vel an awm a ni. 

Rorel lai PS hi ralthuam ruk bo thupa puhna avangte leh duhsak zawngte hna pek chungchang avang tein an mualpho ve hle a, mahse mipui tam zawkin an vote leh tho a ni. 

António Costa thukhawchang

Prime minister António Costa chuan an thurualpui Left Bloc leh Communists-te nen chuan mipuiin la sorkar se an duh tih vote chhiar tawh aṭang chuan a lang thei tih a sawi a, mawhphurhna hlen zo tak leh phur takin an ram chu kaihhruai a tum tih a sawi.

People-Animals-Nature party (PAN) party pawh inbiakna neihpui a tum tih a sawi bawk a, euro-zone budget rules a kalpui chhunzawm rin a ni bawk. 

Share this Post