La Liga:Zaninah Atletico Pathianni zanah Barca, Valencia leh Real inlan dawn
Barcelona laka chak lo hlim Atletico Madrid chuan zanin dar 8:30-ah Eibar an mikhual dawn a, Diego Simeone-a naute tan chetsual a thiang tawh lo.
Pathianni tlai dar 4:30-ah Barcelona chuan Levante an lenchilh dawn a, zan dar 1:00-ah Real Madrid-in Granada an luhkhung bawk ang.
Gary Neville-a hnuaia chak hmel hmu thei lo Valencia an inlan dawn bawk a, Pathianni zan dar 8:30-ah Real Betis khelmualah an lenglut dawn.
Atletico an buai
Kar hmasa lawkah Atletico-in La Liga-a hmahruai theihna hun ṭha an nei a, mahse an chung chiaha awm Barcelona lakah 2-1 in an tlawm. Madrid khaw club hian a chung bera awm Barcelona chu khelh khata khel tam zawk nichungin point thumin an phak lo mek.
An match hnuhnung palia chak hmel la hmu lo Atletico buaina belhchhah turin player hrem tawk an awm nual. Barca an hneh loh ṭuma hnawhchhuah Filipe Luis chu match thum chhung atan hrem a ni a, Juanfran chu hrem vangin a inlan thei dawn lo bawk. Barcelona an hneh loh ṭuma hnawhchhuah tawk ve tho Diego Godin chuan a khupah hliam a tuar a, centre-back Stefan Savic leh midfielder Augusto Fernandez-te chu hliam vangin an inlan thei dawn lo bawk.
Centre-back Jose Gimenez chuan, "Diego, Filipe leh Juanfran-te inhliam hi kan tuar dawn tih a chiang a, mahse player khel apiangin kan theihtawp kan chhuah ang," a ti.
Barca inlan zan
Barcelona-in an hmaa awm apiang an hnawt kiang zel a, Pathianni tlaia Levante khelmuala an lenluh hunah pawh Catalan club hi chak chiang tura ngaih an ni.
Spanish Cup semifinal-a Valencia sawp zo hlim Barcelona hi an match hnuhnung pangaah an la chak vek a, heng match ngaah hian goal 16 khungin goal thum chiah an chhuah.
Tun season-a match 33-a inlana goal 35 khung tawh Luis Suarez, match 27 a inlana goal 24 khungtu Lionel Messi, match 28 a inlana goal 21 khungtu Neymar-te hi an 'puja' fuh lai vek a ni a, an match hnuhnung pangaa goal kaw chhuahtu Levante tlarhnung tan mut ti tui lo tham an ni.
Neville-a dinhmun hriltu
Gary Neville-a'n December 2-a Valencia a enkawl hnuin La Liga-ah match riat a hmachhawn pui tawh a, chak hmel a la hmu lo. Vawi nga an khingpuite inhnehtawkpuiin vawi thum a tlawm zawkah an ṭang a ni.
Spanish Cup-a Barcelona laka an mualpho hnu phei chuan English manager an duh lohna thu hi Valencia fan-te'n an tlangaupui nasa a, Valencia chanchina an keeper ropui ber pawl Santiago Canizares chuan Manchester United defender hlui hi ngaihdam dila a hna bansan turin a ti hial.
Zanina Real Betis an hmachhawn hunah Valencia hian chak hmel an hmu zo lo a nih chuan Neville-a dinhmun a derthawng zualin a rinawm, fan-te lung-awi lohna a hma aiin a nasa tawh ang.
Goal khung thiam Real
Zinedine Zidane-a enkawlna hnuai-ah Real-in goal khung an harsat lo. French manager enkawlna hnuaia match li an khelh tawhah goal 17 an khung a, goal hnih chiah an chhuah.
Granada-in an khelmuala match an khelh hnuhnung sawmah vawi khat chiah goal chhuah loh an nei a, goal khung thiam Real tlarhma hmachhawn hi an tan a hautak dawn.
Pathianni zana an hmachhawn tur Granada nen an inhmachhawn hnu-hnung pangaah Real an chak fai vek a, match khat chiah goal chhuah vein Granada goal lamah match khatah goal 3.4 khung ang an ni.