I League U18 Pathianniah AIFF Academy Vs Aizawl FC
Aizawl FC-in I League Under 18 hneh loh nei loin I League Under 18 semifinal an hmachhawn tur chu India rama naupang
ṭha rual awm khawmna AIFF Elite Academy te an ni. Pathianni hian Howrah Stadium, Kolkata-ah semifinal khelh a ni dawn a, Aizawl FC te hian chawhma dar 9:45-ah an inkhel ang. Semifinal hnuhnung hi chawhnu dar 2:00-a khelh tur niin Salgaocar leh TATA Football Academy te an inhmachhawn ang.
Aizawl FC dinhmun
I League Under 18-ah Aizawl FC-in Neroca FC leh Gangtok Himalayan SC te vawi hnih ve ve hnehin final round an lut a, a hmawr bawkna Kolkata-a neiah Aizawl FC an cheṭha chhunzawm zel. Mizo club hi Group B-ah Salgaocar FC, Pune FC, Royal Wahingdoh FC leh East Bengal te nen a awm ho a, hneh loh a nei lo. Aizawl FC hian group hmahruaitu Salgaocar hneh hial mah se Pune leh Wahingdoh an draw avangin pahnihna an ni.
Semifinal-ah Aizawl FC-in inhliam vangin Vanlalduatsanga an chhawr thei lo a, captain Stephen Lalnunmawia chu hrem vangin a inlan thei dawn lo bawk.
Aizawl FC coach Nicky Malsawmtluanga chuan, "AIFF Academy match hnuhnung ber kha kan en a, team ṭha tak chu ni mah se kan hneh thei turah ngai. Semifinal khelhna tur Howrah Stadium hi East Bengal ground aiin a ṭha zawk a, chuvangin kan game pawh a
ṭhat sawt theih kan beisei. Kan player-te hian tlawm an hreh takzet a, chu chu kan ṭhatna lai chu a ni," tiin Vanglaini palai a hrilh.
Aizawl FC tan goal venhim kawngah keeper Lalmuanawma bakah defence laia inkawp Lalṭhakima leh Jonathan Lalhriatkima te an pawimawh dawn a, goal khung kawngah Lalmuanzoa leh Rochharzela te an pawimawh bawk ang.
AIFF-ah Mizo 4
AIFF Elite Academy-ah Mizo pali Edmund Lalrindika, Jerry Lalrinzuala, Zonunmawia leh V. Lalengzama te an awm. Lunglei midfielder Edmund leh Champhai wing back Zonunmawia te hian 2015 Subroto Cup-ah AIFF Academy hi an champion pui a, Bethlehem left back Jerry hi India sub junior team tan pawha captain tawh a ni.
Player pali zingah V. Lalengzama'n tawnhriat a la nei tlem ber a, Mizoram team tana Subroto Cup-a chet ṭhat vanga AIFF Academy zawm a ni.
Semifinal - February 7, Pathianni
09:45 AM AIFF Academy Vs Aizawl FC
02:00 PM Salgaocar Vs TATA FA