Vanglaini - President hlui Musharraf Politics-ah kir tum

KHAWTHLIR

Vawk lak luh khap

Lunglei District Magistrate chuan Cr.PC Section 144 hmanga hriattirna chhuahin, Lunglei district aṭanga vawk thawn chhuah leh district dang aṭanga vawk lak luh khap a nih thu a tarlang. Thupek hi Mizoram ṭhenawm state/ramah vawk natna - PRRS leh African Swine Fever a lên vanga ni a; vawk thi reng reng ṭha taka phûm tur a nih thu te, vawk hrisel ṭha chauh talh tur a nih thu leh, vawk damlo chu hralh loh tur a nih thute a tarlang bawk.

Thisen pe

Mizo Higher Secondary School NSS unit chuan nimin khan Aizawl Civil Hospital tan thisen unit 98 an pe a, a petute mipa 74 leh hmeichhia 24 an ni.

Fihlîm turin chah

Mizoram Youth Commission (MYC) chairman Dr Vanlalṭanpuia, MLA chuan nimin khan a bial chhunga Baptist Higher Secondary School-in Ṭhuamluaia Muala Annual School Sport vawi 59-na an hman ṭan a hawng. MYC Chairman chuan, zirlaite chu HIV/AIDS hlau tura chahin, natna tihdam theih loh laka an him theih nan ruihhlo hman sual leh mipat hmeichhiatna hman khawloh laka fihlim turin a chah a; India rama intihsiakna ṭha ber bera lut pha tura competitive mind pu turin a fuih bawk.

Nungcha humhalhInzirtir a ni

National Wildlife Week, 2019 hman mek pualin nimin khan Khawzawl Wildlife Division leh Champhai Forest Division chuan Khawzawlah nungchate humhalh pawimawhzia inzirtirna, 'Awareness campaign on protection of wildlife' an buatsaih. He hunah hian Khawzawla YMA branch hrang hrang, Khawzawl Group YMA, Khawzawl Joint YMA, Khawzawl Joint V/C-a office bearer-te leh, Khawzawla zirna-in palia zirlaite an tel.

No Tobacco Week

Pentecostal Youth Department (UPC NEI), Chhimtuipui district chuan an conference rorel (No Tobacco to PYD) bawhzuiin October 1-6, 2019 chhung khan No Tobacco Week an hmang. Week hi October 1-ah hawngin, Pathianni khan an khâr a ni. No Tobacco Week chhung hian Chhimtuipui district chhung bial paruka khaw chhung lûn laiah vaihlo leh a kaihhnawih ṭhat lohna lam Mizo, Mara leh Lai ṭawnga ziah signboard an tár a, poster, phamplet leh no tobacco signage chi hrang hrang an sem bakah, slogan inziahsiak an buatsaih.

DAWNTISEI

President hlui Musharraf Politics-ah kir tum

Pakistan president hlui Pervez Musharraf chuan a hriselna ṭhat tawk loh avanga kum khat chuang zet politics lam a chawlhsan hnuah, a party All Pakistan Muslim League (APML) tuaithar a, politics lama kir leh a tum.

President a nihna aṭanga paihthlak a nih hnuah, Musharraf hi kum 2014 khan ram phatsantua puhna thubuai siamsak a ni. Hemi hnu hian kum 76 mi, Musharraf hi ram pawn lamah tlanchhiain, kum 2016 aṭang khan Dubai-ah a khawsa a ni. Ram phatsantua puhna thubuaiah hian thiam loh chantir a nih chuan thi tura hremna pek theih a ni ang.

APML hruaitu Musharraf hian amyloidosis natna a nei a, September thla pawh khan London-ah ni 12 chhung enkawl a ni. APML general secretary Mehreen Mali chuan an party hotu dinhmun hi a ziaawm tawh a, Dubai lamah a kir leh tawh tih a sawi.

Pathiannia APML foundation day puala Islambad-a inkhawm hun buatsaihah, Musharraf hian Dubai aṭangin video link kaltlangin thu a sawi. Musharraf chuan India chuan Pakistan beih a tum nia sawiin, beih an tawk a nih vaih chuan Pakistan sipaite chuan an thisen far tawp thlengin an bei let dawn a ni, a ti.

Share this Post

Login to comment

No Comments