Man City nge hma hruai dawn Leicester?
Zanin dar 6:15 hian Premier League hmahruaitu Leicester City chuan an hnuai chiaha awm Manchester City khelmualah an leng lut dawn a, inkhel result a zirin hmahruaitu thar kan hmu maithei.
Leicester hian match 24 khelh tawh aṭangin point 50 hmuin hma an hruai mek a, Man City nen hian point thumin an inthlau mek.
Season ṭan tirh kha chuan Leicester hi February thlaah table chung bera an awm ring an awm lo hial ang. Mahse, Claudio Ranieri naute hian mipui an barakhaih a, an match hnu-hnung berah pawh Jamie Vardy goal hnih hmangin Liverpool chu 2-0 in an hneh. Italian manager Ranieri hian pressure nei loa Etihad Stadium an pan tur thu a sawi a, chumi awmzia chu chak loh zawka tura rin ni chung siin chak tumin an khel dawn tihna a ni.
Manchester City erawh an khelmuala Leicester an draw pawhin dem an hlawh ang, pressure sang tak nei chungin point thum hlawh-chhuah an tum ang. City hian an khelmuala league match an khelh hnuhnung vawi 19
aṭangin vawi 16 ngawt hnehna an chang thei a, Foxes an hma-chhawn hnuhnung vawi thumah goal an chhuah miah lo bawk.
City hotuten manager Manuel Pellegrini hnuaiah an duh khawp an hmu lo a, season thar atan Pep Guardiola nen contract an ziak fel tawh. Chilean manager hian City-ah beisei tur nei tawh lo mah se club ṭha zawk aṭanga zawmna a hmuh theih nan record ṭha tak nen seson khar a duh ang. Pellegrini hian City hi Premier League, Champions League, FA Cup leh League Cup-ah te champion turin beiseina a la neih pui vek. League champion ni turin City tan zanin inkhel hi a pawimawh takzet a, point ruk inchuhna ang hiala sawi theih a ni.
Team chanchin
Manchester City winger Jesus Navas chu hliam vangin a dinhmun a chiang lo a, Kevin De Bruyne, Vincent Kompany, Samir Nasri, Eliaguim Mangala leh Wilfried Bony te pawh hliam vangin an khel thei lo mek. Fabian Delph erawh a inkhelh theih tawh beisei a ni.
Leicester manager Claudio Ranieri chuan a defender thar Daniel Amartey a chhawr thei tawh dawn. Foxes tan hlian Jeffrey Schlupp leh Matty James te chu hliam vangin an inlan thei lo ang.
Arsenal ve thung
Champion tum, champion tura rinkai leh champion beisei awm an nih hnua tuna Arsenal dinhmun chu season thara Champions League khelh phak a ni.
Gunners hian Pathianni zan dar 7:00 hian table-a 15-na dinhmun luah mek Bournemouth khelmual Dean Court an pan dawn. League table-a palina dinhmun luah mek Arsene Wenger-a naute tan point khata lungawi a hun tawh lo.
Arsenal hian league match an khelh hnuhnung paliah chak ni hmel an hmu miah lo. Kum 2009 February thla hnua a vawi khat nan match thumah goal an khung lo bawk.
Manager mahni thu duh ve tak Wenger-a'n Alexis Sanchez, Aaron Ramsey, Theo Walcott leh Mesut Ozil te hmaah French striker Olivier Giroud a din tir thei a, goal khung loin match li chhung an khelh a rinawm loh. Amah-erawhchu season tawp lam a hnaih tawh avangin Arsenal chet chhiat hun a in ṭan
leh tawhah a ngaih theih a, point thum hmu chiang saa dah erawh a finthlak lo ang.
Costa hun
December thlaa Chelsea leh Manchester United goal awm loa an inhnehtawk ṭumin Diego Costa chu hrem vangin a khel lo, Spain international striker hian season liamta khan inhliam vangin United hi a hmachhawn tawh lo.
Chelsea striker Costa hian Hiddink-a hnuaiah hartharna a chang a, league match vawi ruk khelhah goal nga a khung a, United tlarhnung tan ven uluk a ṭul ang. Manchester United lam pawhin chhuan tur a nei a, captain Wayne Rooney-a'n kum 2016-ah goal sarih a khung tawh. Pound matkaduai 36 man striker Anthony Martial-a'n a man phu tawka a khelh chhoh zel bawk avangin Pathianni zana Chelsea leh United inkhel tur hi a hmuhnawm ang.