Zangnadawmna chungchang sawiho

Kolasib DC H Lalengmawia hoin nimin khan a pisaah Bairabi-a NH-154 zauhna atana PWD hmalak tawhnate leh ram lak tura zangnadawmna chungchanga lungawi lo aiawh ukilte an ṭhukhawm a, thil pawimawh hrang hrang an sawiho.

H Lalengmawia chuan, kawng zauhnaa ram laksaka zangnadawmna peka lungawi lo an awm chungchangah, hmaichhana inbiakna neih ṭha a tih avang leh, thil awm dante inhrilhriat ṭhaa a hriat avangin meeting a ko tih a sawi.

PWD executive engineer Sanghrima Chawngthu chuan hma-lak tawhna a sawifiah a; tun dinhmunah in panga ṭhiah loh a la awm a, chungte chu police in pathum leh mimal in pahnih a nih thu a sawi.

Zangnadawmna chung-changa lungawi lo ukilte chuan an thu hmuh dante sawiin, Supplemantary Award siam an beisei thu DC an hrilh a ni.

Kolasib DC chuan, ukilte thusawi chu chinfel a nih theihna atan theihtawp a chhuah tur thu a sawi a, "Ka tih theih chin bak chu hotu sang zawkte hnenah ka thlen ang," a ti.