Bangladesh-a Rohingya raltlante Myanmar rama hruai kir tumnaah raltlan tumah inlan duh an awm lo. 

Bangladesh leh Myanmar sorkarin inremna an siam angin, nimin khan raltlante hruaikirna tur hian bus panga leh truck 10 ruahman a ni. Motor hian raltlan hruai kir turte chu zing aṭangin a nghak a, mahse tlai thlengin raltlan tumah an inlan duh lo tih Bangladesh official in charge Teknaf refugee camp, Khaled Hossain chuan a sawi. 

Kum 2017 August thlaa Myanmar sipaiten Rakhine state-a beihpui an thlak avangin Bangladesh-ah hian Rohingya Muslim 7,40,000 vel an tlanchhia a, Bangladesh-a Rohingya lo awm sa 2,00,000 vel chu zawmin, refugee camp hrang hrangah an khawsa mek a ni.

Nikum November thla khan raltlante hi hruai kir tum an lo ni tawh bawk a, mahse hemi ṭum pawh hian an hlawhchham a ni. 

July thla khan Myanmar high-ranking official-te chuan Permanent Foreign Secretary Myint Thu hoin refugee camp-te hi an lo tlawh tawh bawk. Bangladesh chuan raltlan 22,000 chuang list chu Myanmar sorkar hnenah enfiah turin a thawn a, enfiah an nih hnuah an zinga 3,450 chu Myanmar rama kir thei tura tihfel an ni. 

Mahse Myanmar rama kir phalsak list-a telte hian an him ngei dawn tih sorkar thuneitute an tiam phawt an phut bakah, citizenship pek an phut bawk. Heng an thil phutte hi tihhlawhtlin a nih loh chuan an tan Myanmar rama kir leh ngawt chu a him dawn lo tih an sawi. 

Cox's Bazar, Bangladesh-a refugee camp-a awmte hi an khawsak a harsain an dinhmun pawh a ṭha lo hle nia sawi a ni a, mahse raltlante hian Myanmar ram aiin an nuamsain an zalen zawk tih an sawi ve thung. Hetiang hi ni mah se camp-a naupangte chu Myanmar leh Bangladesh curricular anga lehkha zirtir phalsak an nih loh avangin naupang tam tak chu lehkha zir loin an awm mek. Camp-ah hian zan lamah electric supply an nei lo bawk. 

Share this Post