Lianzuala & Apuia ten Champions League khel dawn
Indian Super League club Mumbai City chuan zanin dar 7:30 hian AFC Champions League-a an match hmasa ber an khel dawn a, Iranian club ṭha Nassaji Mazandaran an mikhual dawn - inkhel hi Sports 18 channel-ah live-a pekchhuah a ni dawn a, online-a en duh tan Fancode leh Jio Tv-ah en theih a ni bawk ang.
Mumbai City khelmual Mumbai Football Arena chu Champions League khelh nan a tling lo a, Pune khawpuia Balewadi Stadium-ah Mumbai hian an home match an khel dawn a ni.
Indian club forward Lianzuala chuan, "Pathian zarah kan inbuatsaihna a ṭha thawkhat bawk a, kan inpeih tawh khawp mai. Team boruak pawh a ṭha e," tiin Vanglaini a hrilh a, mikhual team lakah a inringtawk.
Lianzuala chuan fimkhur erawh a ngaih thu sawiin, "A awlsam ka ring lo. Mahni ram ṭheuha a ṭha ber an nih tawh avangin tumah khelh awlsam tur an awm lo ang. Mahse, mahni mualah kan khel dawn," a ti.
Mumbai City hian Lianzuala bakah midfielder Lalengmawia Ralte (Apuia), PC Rohlupuia leh defender Hmingthanmawia Ralte (Valpuia) an nei a, mahse, Lianzuala leh Apuia chu Mumbai tan inlan tura beisei an ni.
ISL club hian Champions League-ah hian group D-ah Uzbekistan Super League club Navbahor leh Saudi Pro League club Al Hilal an awmpui bawk a, Mazandaran hi an khingpui tur zingah chuan team nem ber tur zawka ngaih an nih avangin Mumbai tan zaninah chak ngei ngei a ṭul.
Mumbai tan Lianzuala bakah Argentine winger Jorge Pereyra Díaz, Dutch winger Abdenasser El Khayati leh Rangers forward hlui Greg Stewart te an chet ṭhat a ṭul dawn a, midfield-ah Apuia tan hna tlin a ṭul bawk ang.
Mazandaran hi mi tam takin Iranian goalkeeper ropui ber ang hiala an ngaih Mehdi Rahmati enkawl an ni a, 2021-22 season-ah khan Hafzi Cup (Iran FA Cup) nomawi chawiin, hei vanga Champions League khel thei an ni.
Iranian club hi an sulhnu a ropui hran lo - kum 2019 khan top flight league khel turin an inpetkai ve chauh a, an club zinkawng ngaihnawm tak hi Iranian documeLianzuala & Apuia ten Champions League khel dawnntary lar tak ‘Hope of Suffered City’ ah tarlan a ni nghe nghe.
Mazandaran hian tlarhmaah Iraq international Alaa Abbas nei mah se visa fel thei lo avangin an rawn hruai lo - AFC Champions League 2018-a Fans' Best XI-a lang phak Farshid Esmaeili an kawl a, Super League Greece thlenga lo khel tawh Mohammad Reza Azadi an nei bawk.
Mahse, Mumbai hian Neymar leh Aleksandar Mitrović te ho khelhna Al Hilal chu an hmachhawn tur zingah an la tel a, Saudi club dang thei turin Iranian club hneh theih dan an zir hmasak a ṭul.