Paris St-Germain sporting director Leonardo chuan Brazil forward Neymar chhuah theihna kawng chu a hma aia a zau tawh thu a sawi.

PSG hian nizan khan an Ligue 1 match hmasa berah Nimes an mikhual a, Neymar hi inlan lo tura ngaih a ni. Leonardo chuan, "A hma aia thuk zawkin indawrna kan nei a, chutihrualin club lam hi chhuah phalna pe turin a la inpeih lo," tiin a chhuah theih thu a sawi rualin ngaihtuah tur a la tam thu a sawi.

Khawvela player manto ber Neymar hi Barcelona-a let leh tura sawi a ni a, an hmelma Real Madrid nen sawi zawm a ni bawk. Kum 2017 khan Neymar hian Catalan club aṭangin PSG hi pound maktaduai 200-in a zawm a, Brazilian forward la chhuak tur tan sum sen tam a ṭul dawn.

Neymar hian hliam vanga buai chungin PSG tan season hnih chhungin league-ah goal 34 a khung a, a man a phu pha lo a nih pawhin theihna sang tak a nei tih erawh a pholang.

Premier League transfer tawp tawh mah se La Liga club-te chuan September 3, zing dar 4:29 thleng player an la lakluh theih avangin Neymar hian Spanish club lian zawm turin hun thawl a la nei a ni.

Share this Post