Aizawl FC-ah Japanese forward Yonezawa

Aizawl FC-in Mizoram Premier League Season 4 khel turin Yuta Kinowaki an la lut a, Japanese midfielder hi MPL champion nomawi an humhimna kawngah a pawimawh hle. MPL4 champion Aizawl FC-in I League khel tura an squad tichak turin Japanese forward Atsushi Yonezawa an la lut a, MPL3 best defender Emma Chigozie an la let a, nikum I League-a Royal Wahingdoh tana khel kim vek thei Lalchhawnkima, India junior team midfielder Lalramzauva, an captain hlui Ricky Lallawmawma leh MPL best keeper Lalawmpuia te chu Zo United aṭangin an la lut bawk.

Aizawl FC hian January 9, Inrinni hian I League match hmasa berah champion lai Mohun Bagan chu Salt Lake Stadium-ah an hmachhawn dawn a, January 6 hian Aizawl an chhuahsan ang. MPL champion hian inelna ṭan hma kar khat pawh tling loah squad an tichiang thei chauh a, amaherawhchu Indian Super League zawhna a la rei loh avangin a mak hran lo. SAFF Cup-a India champion puitu Jeje Lalpekhlua pawhin club a la nei lo a, dawrtu erawh a ngah hle.

I League club hian foreigner pali an nei thei a, pali zinga pakhat hi Asian an ni tur a ni a, khelmual chhungah an vaiin an lut nghal thei vek bawk. Aizawl FC hian Liberian forward Alfred Kemah Jaryan, Nigerian defender Emma Chigozie bakah Japanese player pahnih Atsushi Yonezawa leh Yuta Kinowaki te an kawl.

Shillong club Royal Wahingdoh tan pawha lo khel tawh Japanese forward Atsushi Yonezawa hi MPL4-a best player, best forward leh top scorer chawimawina dawngtu F. Lalrinpuia a awm loh avangin team tichaktu pawimawh tak a ni dawn. Republic Veng tlangval Valpuia bakah MPL3 top scorer Lalbiakhlua ten All India Police Meet an khelh avangin Aizawl FC match hmasa pahnihah an inlan thei dawn lo.

Feet ruka sang Japanese forward Yonezawa hi Indonesian club Persiba Bantul leh Burmese club Zwegabin United FC tan a khel tawh a, India ramah Royal Wahingdoh tan khel tawh mah se Shillong club tan hming a chher tawk lo a, Aizawl FC hian Japanese forward tan hian hming chherna hun ṭha an siam sak ang.

MPL4-ah Aizawl FC champion tho mah se tlarhnung lam chu I League atana ṭha tawk loah ngaih a ni. Squad ti chak turin Chhawnkima leh Emma te hi an pawimawh ngei a rinawm a, goalkeeper AwP-a erawh MPL season li chhunga best goalkeeper-ah thlan ni vek mah se Manipur keeper Soram Poirei leh MPL1-a Dinthar champion puitu keeper Zothanmawia te nek chhuak turin a ṭan ve hle a ṭul ang.

Aizawl FC player lakluh zinga naupang ber Luangmual rawlthar RZ-a hi India junior team-ah player
ṭangkai a ni a, a ṭhiante pahnih Daniel Lalhlimpuia leh Malsawmzuala ten Bengaluru FC an zawm. January 16 Inrinni hian Rajiv Gandhi Stadium, Mualpuiah Aizawl FC leh Bengaluru te hi an inkhel ang.