5 star Man City, Spurs tan Kane

Premier League champion lai Manchester City chuan season khuh hawn nan London Stadium an luhchhuah a, Raheem Sterling hattrick hmangin West Ham United 5-0 in an sawp. 

Inrinni zan inkhel dangah kai thar Aston Villa-in hun rei tak Tottenham Hotspur chelh mah se hun tawp hmaa Harry Kane goal hnih hmangin 3-1 in an chak lo. 

Man City leh Spurs ṭhatzia a lang nghal a, August 17 zan hian Eithad Stadium-ah club lian pahnih hi an inhmachhawn dawn. Season bul ṭanna chauh ni mah se point khatin champion a hril phak avangin inkhel pawimawh a ni ang.

City an Class

Pep Guardiola-a'n player thar Rodri bul a ṭantir a, Sergio Aguero chu bench-ah awmin Raheem Sterling, Gabriel Jesus leh Riyad Mahrez te hmangin an nawr. Inkhelh ṭantirh lamah West Ham an ṭang khawng a, Man City an duh angin an tal bik lo.

Amaherawhchu, minute 25-naah Kyle Walker chuan ṭha zetin overlapping a rawn la a, English right back hian cross ṭha neiin Gabriel Jesus-a'n a thai lut. Man City thiamzia a lang a, commentator-in goal tam tak an khung tur zinga hmasa ber an khung a tih chuan a sawi thui hle.

Second half-ah Kevin de Bruyne-a'n a tih ṭhin danin goal khung nuam tawk turin Raheem Sterling tan a siam a, minute 51-naah Liverpool forward hlui hian a puitlin tawhzia a pholang.

Man City pawhin keeper ṭha an mamawh tih a lang zui a, Brazilian keeper Ederson chuan Hammers forward Javier Hernandez leh Manuel Lanzini pet a zawn zatin a dang. West Ham phur chho tur tih reh nan Riyad Mahrez-a ball fing chu Sterling-a'n offside trap bumin Man City goal thum nan a khung.

Substitute Aguero pawhin minute 86-naah penalty hmangin account a rawn hawng a, injury time-ah Sterling-a'n hattrick a siam. City boss Pep Guardiola chuan, "Sterling hi player ṭha tak a ni a, khel ṭha tur chuan midang a mamawh. Team anga kan khelh 

ṭhat chuan a khel ṭha zual. Tlarhma position pathumah hian a khel thei vek a, striker-ah hian a la awm ṭan ve chauh a, kei chuan he lai hmun hi a ṭhatna tur tak niin ka hria," tiin a sawi.

Sterling hian season hnih chhungin Premier League-ah goal 35 khungin assists vawi 32 a nei a, hma a sawn zel avangin Manchester City rinrawl ber a ni chho tawh. Pep Guardiola hote hian an elpui Liverpool hnehin Community Shield an la tawh a, goal nga zeta bul an ṭan avangin Premier League ti hmuhnawm loh rawihin an sang fal ang tih chu inkhel ngainatute hlauhthawn a ni.

Villa an ṭang rei

Tottenham Stadium-ah mualneituin Dele Alli, Son Heung-min bakah player thar Ryan Sessegnon leh Giovani lo Celso te an chhawr thei lo - heti chung hian kai thar Aston Villa lakah chak tura ngaih an ni.

Mauricio Pochettino hoten nung takin bul ṭan mah se minute 9-na lekah Villa tan John McGinn-a'n ṭha zetin a pet goal. Dean Smith hoten goal venhim hna an thawk a, chutihrualin goal nawr a ṭul chuan an tlan chhuak hreh lo.

Spurs-in goal an khung lawk loh avangin an talbuai a, Spain club nena sawi zawm substitute Christian Eriksen rawn lutin an ball chan tamna chu awmze neiin a rawn ti danglam. Minute 73-naah Spurs player manto ber £53.8m man Tanguy Ndombele chuan box pawn aṭanga petin siphurh sutna goal a khung.

Mualneitu goal nawr a na chhunzawm a, Villa player box chhunga an khah ṭhup avangin chance ṭha an insiam thei lo. Villa thiampuipa Jack Grealish chuan box pawnah ball hlauhin ball per chu Kane a zawnah kher tla fuhin English striker hian chiang zetin minute 86-naah a pet goal. Premier League kai thar ṭang tur an awm tawh lo a, injury time-ah Kane-a'n a khung belh leh bawk.

Tottenham boss Mauricio Pochettino chuan, "Kan khelh dan tur kan chiang tawk lo a, ka thiam loh a ni. First half-ah khan tihsual tam tak kan nei a, second half-ah erawh kan tihsual kan siamṭha. Chak a bul kan ṭan hi kan tan a pawimawh takzet," tiin a sawi.

Aston Villa boss Dean Smith chuan, "Khel ṭha mah ila point kan la hmu lo. A tawpah team ṭha zawkin hnena an chang. Champions League finalist lakah thil thar kan zir a, Villa Park-a kan inlan hmain insiamṭhatna tur kan ngah hle a ni," tiin hun tawp thlenga khelh ṭhat a ṭul thu a sawi lang.



Share this Post

Login to comment
No Comments