English football inelna sang Premier League chu khelh ṭan a ni ta a, club lian chak karah kai thar Sheffield United chuan point an sual chhuak nghal. Season hmasa ang bawkin table laihawla awm team an intiat tawk leh hle dawn niin a lang.

Inrinni zan inkhelah Burnley chuan Southampton 3-0 ngawtin an sawp a, Watford mualah Brighton chu si thum faia an chak laiin Crystal Palace leh Everton te chu goal lut loin an inhnehtawk thung a ni.

Sharp-a goal

Season hmasa lama Premier League tawnhriat nei tawh Bournemouth-in an mikhual Sheffield United lakah inkhel an thunun a, minute 62-naah Chris Mepham chuan Callum Wilson-a shot per let chu goal hmahruai atan a khung a, a league goal hmasa ber hi an chakpui dawn niin a lang hman.

Mahse, bench aṭanga rawn lut Sheffield United striker Billy Sharp chuan khelmualah minute ruk chauh hun a hmang hman tihin goal a khung a, an legue match hmasa bera point khat hlawhchhuah nan a tawk.

Kum 33 mi Sharp hian tun hmain EPL match hnih chiah a la khel, 2012-13 season khan Southampton tan a lo inlan ve tawh; season hmasa khan Championship-ah goal 24 a khung a, kuminah minute 90 chhung a inlan reng lo a nih pawhin goal dang a neih belh a beiseiawm hle.

A goal lo

Selhurst Park-ah Everton midfielder Morgan Schneiderlin chu minute 76-naah hnawhchhuah a ni a, Roy Hodgson-a nauten tam zawk an nih hnuah na takin nawr mah se Jordan Pickford an paltlang thei lo.

England international keeper Pickford hian Jordan Ayew leh Max Meyer te khung tur chu ṭha zetin a zawnin a dansak. Nipui bazar laia chhuak tura thawm nei lian Wilfried Zaha chu bench 

aṭanga luhtir a ni a, Ivory Coast international hian goal a sual chhuak zo bik lo.

Marco Silva-a'n midfielder Gylfi Sigurdsson chungah mawhphurhna a dah sang leh a, ani hian season hmasa lama a ke hmui tak a la nei leh rih lo. Juventus striker hlui Moise Kean-a'n mipui lawm a hlawh a, an lawma ti zual turin goal erawh a la pai tel rih lo thung. 

Goal thum

Season hmasa khan Burnley-in Europa League qualifier an khel a, hei hi league lamah an tuar - an match hmasa panga 

aṭangin point khat chuah an hmu. Kuminah erawh Sean Dyche-a nauten inbuatsaihna an nei ṭha tawk, striker Ashley Barnes-a goal hnih bakah midfielder Johann Berg Gudmundsson goal hmangin Southampton 3-0 in an sawp.

An mualah Watford an mualpho. Abdoulaye Doucoure-a'n an lama a tih luh hnuah Brighton lamin Florin Andone leh Neal Maupay te hmangin an khung belh a, khualmualah 3-0 in hnehna an chang.

Brighton manager Graham Potter chuan, "Elpui team khelmuala hnehna chang chunga season bul ṭan theih chu duhthusam a thleng dik a ni," tiin a sawi. Watford boss Javi Gracia erawhin an chak loh danah chhuanlam siam a tum lo a, "Hmasawn kan ngai," tiin an inenfiah tur thu a sawi.

Share this Post