Vanglaini - Mumbai City-in Tunisian striker lalut

KHAWTHLIR

Taxi service dawn lo

Aizawl Two Wheelers Taxi Association (ATTA) chuan vawiin hian nilengin Chawlhhmun YMA hall-ah 'Chhung inkhawm' an nei dawn a, vawiin hian 2 wheelers taxi service a awm dawn lo a, mipui hriatthiamna an ngen.

Thisen pe

Bethlehem Venglai Branch KṬP chuan Inrinni khan an Kohhran Hall-ah blood donation camp an huaihawt a, Synod Hospital tan thisen unit 49 an pe a, a petute mipa 44 leh hmechhia panga an ni.

Candidate puang

August 30, 2019-a Chaltlanga local council by-election neih tura ZPM candidate tur chu R Lalsangpuii a nih thu, Inrinni khan bialtu MLA Vanlalhlana'n Chaltlang Dawrkawna vantlang inkhawmah a puang. Candidate puan inkhawmah hian ZPM president Lalliansawta leh Aizawl South-II bialtu MLA Lalchhuanthanga te pawhin thu an sawi a ni.

Damdawi man

Central YMA SRS hnuaia Pharmaceutical Abuse Drugs Squad (PADS) chuan August 10, Inrinni khan khan Dawng Dawng Pharmacy, Lower Zarkawt aṭangin Tramadol mûm 13,770 an man a, damdawite chu Mizoram sorkara drugs controller hnenah an hlan.

Free clinic

Aizawla Kanan Veng Branch KṬP chuan August 10, Inrinni khan Tuipuibari-ah a thlawna inentirna (free clinic) an buatsaih a, an branch-a doctor-te'n mi 300 chuangte hriselna dinhmun an enfiah.Tuipuibari-a Synod Mission Board thawktute chuan, an rawngbawlna hmun hmuhpui a, mipui mamawh tak inentirna buatsaihsak an ni chu an lawm tak zet thu an sawi.

Sorkarah lawm

Ngopa RD Block

chhunga Joint Students Union chuan thuchhuah siamin, Saitual district-a awm an duhnate hriaa Ngopa leh a chhehvela khuate Mizoram sorkarin Saitual district-a awm tura a ti chu lawmawm an tih thu an tarlang. Hliappui Area Joint Village Council pawhin an khua leh a chhehvelte Saitual district-a dah an nih avanga an lawmthu an tarlang bawk.

DAWNTISEI

Mumbai City-in Tunisian striker lalut

Indian Super League club Mumbai City chuan Tunisia tana vawi 35 inlan tawh Mohamed Amine Chermit an lalut a, kum 31 mi striker hian German club Hertha Berlin tan pawh a lo khel tawh.

Tunisia tana vawi ruk goal khung tawh striker hian French Ligue 1 club Gazelec Ajaccio tan kum 2016 khan a lo khel tawh bawk a, kum 2007 khan Etoile du Sahel chu African Champions League-ah nomawi a chawipui.

Etoile tana Champions League nomawi a chawi

ṭum hian inelnaah goal riat a khung a, hetih hunlai hian African player ṭha pawl zingah lam hmaih a ni ngai lo.

Swiss club ṭha FC Zurich tan 2010-15 chhung kha a khel a, Europa League leh Champions League pawh khelhsakin tawnhriat a nei ṭha hle.

Share this Post

Login to comment

No Comments