Hiddink a hnuaiah a vawi khat nan Chelsea an chak

Chelsea-in Jose Mourinho an ban hnuah Guus Hiddink an la lut a, Dutch manager hnuaiah a vawi khat nan Pathianni zan khan an chak.

Dutch manager Hiddink-a'n Blues-ah bul a ṭan fuh tawk lo a, December 26 zanah Stamford Bridge-ah club tenau Watford chu 2-2 in an inhnehtawkpui.

December 26-ah Old Traf-ford-ah an zin a, goal awm loa inhnehtawkin match hnih chhung chu an chak zo lo. Pathianni zanah erawh thil a danglam a, minute 90 chhung inkhel thunun chungin Chelsea-in 3-0 in Crystal Palace an hneh.

Chelsea tan Oscar chuan minute 29-naah goal hmahruai a khung a, Chelsea-in inkhel an thunun chhunzawm. Blues chet chhiat season-a che chhe ve lo Willian chuan minute 60-naah goal ropui a khung a, minute ruk hnuah Diego Costa chuan an goal thumna a khung ve leh bawk.

Selhurst Park-a inkhelah mikhual team Chelsea an chung-nung a, Premier League table-ah 14-na dinhmun luahin palina Manchester United chu point 13-in an la pha lo. Chelsea hi match li chhung chu chak loh hmel hmu loin an katluang ta a, tun season-a an kaltluan rei ber ṭum a ni.

Costa a inlar

Chelsea boss Guus Hid-dink-a'n lawmna chhan tur a nei a, a striker Diego Costa chuan season bul ṭan chhe mah se Crystal Palace lakah a zia a pholang. Blues goal thumah a inrawlh vek a, Palace tlarhnung te'n Spain international striker hi an chelh lo hle.

Blues tan John Mikel Obi a khel ṭha takzet a, Chelsea midfield-ah Nigerian midfielder hian a ṭangkaizia a pholang. Palace laka a khelh dan ang renga a khelh chuan Chelsea harhtharna thlen tura player
ṭangkai a ni thei ang.

Hazard a inhliam

Hiddink atan result lawm-awm phenah chanchinthar duhawm lo a awm a, season liam-ta Premier League player of the year Eden Hazard a inhliam. Palace an hmachhawn hmain Dutch manager hian tun season-a beisei phak lo Hazard chuan ngai a awh chho leh tawh niin a sawi a, mah se Selhurst Park-a inkhelah Belgian winger hi a inhliam a, minute 15-naah lakchhuah a ni.

Palace laka an khelh dan en erawh chuan Chelsea hian Hazard hi an mamawh lo niin a lang a, Blues tlarhmaa Costa, Willian leh Oscar-te inkawp an hmuhnawm hle.

Eng nge an sawi?

Chelsea manager lailawk Guus Hiddink chuan, "Kan phur uchuak tur a ni lo. Match hnih kan chak zawh loh hnua kan chakna hmasa ber a ni a, hnehna kan chan dan pawh a lungawi thlak hle. Tupawhin kan team thiamna leh theihna hi chu an hrechiang a, mah se ngaihṭhat luatah a chang chuan chetsual a awl ṭhin. Kawng zawh tur tam tak kan la nei a, chhiarkawp dan ang chuan Champions League hi kan la beisei thei a ni. League hautak em emah kan khel a, mah se zanin anga kan khelh zel phawt chuan kei chu ka hlim ang," tiin a naute khelh danah a lawm hle.

Crystal Palace manager Alan Pardew chuan, "Kan ṭhat dan berin kan khel lo. Kan player pawimawh chhawr theih loh kan nei nual a, kan game pangngai kan phak lo a ni. Transfer bazar-ah player lakluh tur kan thlithlai ang," tiin January transfer-ah player thar an zawn tur thu a sawi.

Inkhel chhehvel

Chelsea tan Crystal Palace an hneh hi Premier League match riat khualmuala an khelh hnuhnunga an vawi khat chakna a ni.

Crystal Palace-in an khel-muala league match sarih an khelh hnuhnungah vawi hnih chiah hnehna an chang thei.

Chelsea tan Oscar-a'n tun hnaia a match li-ah goal hnih a khung a, hemi hma hian match 14 chhung goal khat chiah a khung.

Diego Costa-a'n Oscar goal khung tur a siamsak kha Blues tana a match hnuhnung 20-a
ṭhiante tana thun tur a siamsak vawi khatna a ni.

Costa hian league match a khelh hnuhnung pahnihah goal thum khungin a ṭhiante thun tur vawi khat a siamsak a, hemi hma hian league match 14-ah goal thum chiah khungin assist vawi khat a nei bawk.

Chelsea tan January 2015-a Swansea 5-0 a an sawp hnua league match-a an chak chian ber ṭum a ni.