Sharmila-in ASFP Act chungchangah Mipui ngaihdan lak a duh

Manipur human rights activist, Irom Chanu Sharmila-i chuan dan sawisel hlawh tak, sipai hnena thuneihna sang pekna dan, Armed Forces Special Powers Act (ASFPA) 1958 hman chhun-zawm a ni leh nih loh chung-changa mipui ngaihdan lak a, thutlukna siamtir a duh.

Kar kalta Inrinni-a Imphal West-a Chief Judicial Magistrate court-a hruai a nih ṭuma chanchin thar lakhawmtute a kawmnaah, Sharmila-i chuan, "ASFSA an duh leh deh loh chungchanga mipuite ngaihdan lakna hun siamsak ni se tih hi ka duh tak zet a ni" a ti.

Kum 15 chuang he dan hi hman a ni tawh a, mahse tun thlengin sorkar chuan he dan hi tihtawp nge, hman chhunzawm zel tur tih chungchangah thu chiang tak a sawi duh ngai lo niin a sawi bawk. Iron Lady of Manipur tia hriat lar, Sharmila-i hian AFSPA hlip tura kum rei tak a lo nawrna chu sorkar chuan a hriatpui duh lo nia a ngaih thu a sawi.

Mipuite chu a hmalakna an theih anga thlawp chhunzawm zel turin a sawm nghal bawk a ni.

AFSPA hlih phuta chaw ngheia nawrh a huaihawt chhung hian Sharmila-i hi mahni intihhlum tuma puhin vawi tam tak man a ni tawh a, chhuah a ni hnuah pawh man nawn leh nghal zel a ni. January 16 hian court-ah hruai a ni leh ang.