Ligue 1 an ṭan - Fabregas an hnawtchhuak

Inrinni zan khan French Ligue 1 khelh ṭan a ni a, 2018 champion AS Monaco chu Lyon lakah 3-0 in an tlawm nghal - he inkhelah hian midfielder Cesc Fabregas chu VAR hman a nih hnuah hnawhchhuah a ni.

Inkhel chu

Stade Louis II-a inkhelah Lyon tan Moussa Dembele chuan minute ngana lekah goal hmahruai a khung, chawlhlawk hma deuhin Fabregas chu Leo Dubois laka a chet dan VAR hmanga ennawn a ni a, Arsenal player hlui hi red card pek a ni.

Player pakhata an tlem hnuah Monaco an bet zui a, goal an phurh tawh avangin tho chhuak thei an awm lo. Memphis Depay leh Lucas Tousart te chuan Lyon chak nemngheh nan goal an khung belh.

Eng nge an sawi?

Lyon manager thar Sylvinho chuan, "Inelna kan ṭan hma khan match hmasa pathum a harsat tur thu ka sawi lawk a, tuna kan hneh tak Monaco pawh hi hmachhawn awlsam an ni lo, vanneihthlak takin hnehna kan chang chauh a ni. Tun ṭum ang hian ṭha taka kan khelh chhunzawm theih ka beisei," a ti.

Monaco manager Leonardo Jardim chuan, "Kan mualah kan inkhel a, point thum hmu chunga season bul ṭan turin kan dinhmun a ṭha hman hle. Mahse, kan duh leh beisei angin thil a thleng lo, match lehpek aṭangin insiamṭhat nghal kan tum ang," a ti.

Hmabak

Monaco hi season hmasa khan an talbuai hle a, tla thei dinhmuna an din hnuah an inhamtang thei hram - an match hnihna atan Inrinni zanah Metz an hmachhawn leh ang. Lyon hian Angers an mikhual ve thung dawn.

Nizan zanlai khan champion lai Paris Saint-Germain chuan an match hmasa ber atan Nimes an mikhual a, result kan hre hman lo. Thomas Tuchel-a naute hi an chesual viau a nih loh chuan Ligue 1 nomawi an kawl lai humhim thei tura ngaih an ni.



Share this Post

Login to comment
No Comments