A chung berah Naomi Osaka

Serena Williams ngam lo mah se Naomi Osaka chu tun kara world ranking chhuak tharah chuan a chung ber luahtu a ni dawn, Japanese player hi a vawi hnih nan world number 1 a ni dawn tihna a ni.

Inrinni khan Rogers Cup quarterfinal-ah Osaka hi Serena Williams nen an inhmachhawn a, Grand Slam vawi 23 champion tawh Serena hian 6-3, 6-4 in hnehna a chang. Semifinal-ah pawh Marie Bouzkova a hneh zui bawk.

World ranking lama Osaka elpui ber Karolina Pliskova chu 6-0, 2-6, 6-4 in Canadian tleirawl Bianca Andreescu lakah a lo tlawm ve bawk. World number 1 hlui Pliskova hian a chung ber luah tur chuan nomawi chawi a ngaih avangin ranking-ah number 2 ni lai Osaka dinhmun a phak dawn ta lo a ni.

French Open nomawi a chawi hnuah Ashleigh Barty-i'n Osaka hi number 1 nihna a chhuhsak a, mahse Australian nula hian result a nei ṭha chhunzawm lo. Tun inelna Rogers Cup-ah pawh second round a paltlang zawh loh avangin a dinhmun a hum thei dawn lo.

Mipa inelna lamah Rafael Nadal a chak zel a, a vannei tel bawk. Spanish tlangvalin semifinal-a a khingpui tur Gael Monfils chu kerek na vangin a inhnukdawk a, inkhelh hah ngai loin final 

a lut.

Semifinal inkhel dangah seeded parukna Daniil Medvedev chuan Karen Khachanov 6-1, 7-6 (8-6) in a lo hneh ve bawk. Nizan zanlai khan final khelh zui a ni a, he thu buatsaih lai hian result kan hre hman lo.



Share this Post

Login to comment
No Comments