Manipur-ah magnitude 6.7 a nain lir a nghing

Manipur state-ah magnitude 6.7-a nain lir a nghing a, lirnghing vanga chhiatna thlengah mi 5 an thi a, mi dang 50 chuangin hliam an tuar.

Thawhlehni zing dar 4.35 a lir nghing hi hmarchhak bial pumah hriat a ni a,a nghin ṭanna chu Manipur-a Tamenglong district, lei hnuai km 17-a thukah a ni.

National Disaster Mangament Authority (NDMA) chuan hriat theih chinah lirnghing vang hian mi 5 an thi a, mi 33 in hliam an tuar tih a sawi a Tamenglong-ah chenna in tam tak a chhia a, Imphal-ah pawh chenna in leh sorkar office building ṭhenkhat a chhe bawk. In chhe zingah market complex pawh a tel. Lirnghing vang hian mi tam tak chu an chenna in aṭangin an tlanchhuak a, electric supply pawh a tawp nghal a ni.

Manipur state bakah hmar-chhak state dang pawh lirnghing hian a sawi tel a, Guwahati leh a chhehvel bialah lirnghing vang hian mi 20 velin hliam an tuar niin Assam Commissioner and Secretary (Disaster Management) Pramod Kumar chuan a sawi. In 30 vel a khi bawk. Cachar district-a Addittional deputy Commissioner official residence pawh lirnghing hian a sawi chhe tel a ni.

Prime Minister Narendra Modi chuan Assam-a cham mek, Home Minister Rajnath Singh a biak nghal thu leh, lirghing vanga chhiatna thlen leh thil awmdan te thlithlai nghal tura a hrilh thu a sawi. PM hian Manipur Chief Minister Okram Ibobi Singh leh hmarchhak state dang chief minister-te pawh a be nghal a ni.

Home Minister chuan Home Affair Ministry-in hmarchhak dinhmunte a ngaihven reng thu a sawi a, Guwahati aṭangin lirnghing tuarte chhanchhuah leh chhawmdawl hna thawk turin National Disaster Response Force team pahnih chu Imphal-ah tirh nghal an ni bawk.

NDMA chuan state sorkar, Ministry of Home Affairs, Ministry of Defence, NDRF, Ministry of Telecom leh a kaihhnawih dan sorkar department hrang hrang leh agency-te nen chhanchhuah leh chhawmdawl hna thawhna kawngah an thawhho thu a sawi. NDMA hian hmarchhak state zawnga zawnga control room/relief commissioner-te pawh a be pawp nghal vek a ni.

Sorkar laipui chuan Manipur leh lirnghing tuartu dang state-te tan a ṭul ang apiangah a pui zel dawn tih Rajnath Singh chuan a sawi bawk. Minister of State for Home Kiren Rijiu pawhin thil awmdan enfiah turin Arunachal Pradesh aṭangin Imphal lam a pan nghal bawk.
Regional Seismological Centre chuan lirhging tunhnaia thleng zingah a na pawl niin a sawi a, hmarchhak bial pumah hriat a nih thu a tarlang.

Nagaland State Disaster Mangement Agency pawhin lirnghing hi state pumah hriat a nih thu a sawi a, mahse thil tihchhiat a nei hriat a ni lo.