Liverpool tan harsatna a awm lo

European champion Liverpool-in Premier League bul an ṭannaah harsatna an tawk lo a, an mikhual Norwich City chu tun season league match hmasa berah 4-1 in an 

sawp nghal. 

Liverpool tan Mohamed Salah chuan a hna ngai thawkin goal a khung nghal a, Divock Origi leh Virgil van Dijk ten goal khat ve ve an khung bawk. 

Anfield-a Liverpool inrintawkna tisang turin Norwich captain Grant Hanley chuan mualneitu tan a an lamah goal hmahruai a khung sak a, a team-in an tuar zui. 

Reds goal khung pali hi first half-a lut vek a ni a, Teemu Pukki-a'n Norwich City tana a khung chu mualpho lutuk tur khuhna goal chauh a ni. 

A hming Origi

Liverpool-in AFCON final khelh vanga chawl rei Sadio Mane an la chhawr ngam lo a, season hmasa Champions League-a Salah leh Roberto Firmino awm loh hlana an hmun ruak zo taka luahtu Origi bawk a rawn ding chhuak. 

Belgian striker hian 'Ka aiawh Lal hmaah a ding' tih ang maiin Mane hmun ruak a luah hneh a, assist a neih bakah goal khat a khung. Norwich defender Hanley 'own goal' chu Origi cross a dan luh a ni. 

Trent Alexander-Arnold-a'n assist a la thiam reng tih pholangin Origi tauh luh tur a siamsak bawk a, Champions League final leh semifinal-a goal khungtu Origi hming a ri ring zel. 

Origi assist leh goal karah hian Salah chuan Firmino siamsak a khung a, Egyptian forward corner aṭanga ball kal chu vengtu nei lo Van Dijk-a'n a tauh lut bawk. 

Liverpool buaina Alisson 

Nipui transfer-ah Liverpool an che na lo a, Norwich lakah pawh hmel thar inlan an awm lo - bul ṭantu pakua chu Champions League final-a bul ṭantu 11 zinga mi an ni. 

Mahse, Jurgen Klopp thlamuan chhan zinga mi Alisson chu first half-ah hliam vangin lakchhuah a ngai a, a aia rawn lut West Ham keeper hlui Adrian-a'n a veng chhe lo. 

Liverpool hrechiangtu journalist James Pearce chuan Alisson hi a lo berah kar li vel tal chu a chawlh a ngai dawn niin a sawi a, third choice keeper Caoimhin Kelleher a inhliam mek bawk. 

Hei vang hian Reds chuan pre-season laia an hnena training nei Andy Lonergan lakluh an tum dawn niin a sawi a, kum 35 mi Middlesbrough chhuah zalen hi an lalut a nih chuan Alisson awm loh hlana Adrian-a thachhang dawltu a ni ang. 

A la tawk lo

Liverpool boss Jurgen Klopp chuan, "Minute 60 chhung chu kan hriam em em a, mahse kan tih tur kan ti tawk lo. Norwich khan fak an phu, huai takin min nawr a, nuam ti takin an khel tawp a ni," a ti. 

Klopp-a sawi angin Norwich hian Liverpool tlarhnung chhaih mangan an nei fo a, Pukki-a goal khung pawh 'class' tia sawi ngam a ni. 

German coach Klopp chuan, "Second half ṭantirah khan goal ngana emaw goal rukna tal khung tur kan ni a, mahse Norwich lamin an khung ta zawk. Khami hnuah kha chuan kan tho leh tawh lo," a ti. 

Norwich boss Daniel Farke pawhin chak lo mah se a naute fakin, "Kum hnih leh a chanve hnua Anfield-a chak hmasa ber nih kan duh a, kan thei ta lo. Result hi pawm harsa tak a ni a, mahse kan khelh dan en chuan result ṭha kan nei thuai ang," a ti a, a phur hle. 

Hmabak

Liverpool-in Nilaini zanah match pawimawh an nei dawn a, dar 12:30-ah Chelsea nen UEFA Super Cup nomawi an inchuh ang. 

Jurgen Klopp chuan Alisson inlan theih loh tur thu a sawi chiang tawh a, Brazilian keeper aiah hian Adrian chu si ban nghak tur a ni dawn. 

Zirtawpni zan inkhelah Liverpool defender Alexander-Arnold-a'n record a siam a, kum 2015-a Mesut Ozil hnua Premier League match nga a zawna assist nei hmasa ber a ni. 



Share this Post

Login to comment
No Comments