MPL10-ah Chung leng inlan hun: AFC Vs Chawnpui : Chak tum ve ve

Zote Toyota MPL10-ah vawiin chawhma dar 11:00 hian I League club Aizawl FC leh Chawnpui FC te an inkhel dawn. League table-a pahnihna leh pathumna an nih avangin en a châkawm a, team pahnihin chak an tum ve ve avangin en a châkawm zual.

Aizawl FC enkawl lailawktu coach B. Malsawmzuala'n chak ngei an tum thu a sawi a, Chawnpui FC coach Lalrindika Hmar-in point thum hmuh an thu Vanglaini a hrilh ve bawk. Chumi awmzia chu attacking football an khel dawn tihna a ni.

Team ṭha ve ve

Aizawl FC hi I League club an ni a, MPL10-a squad chhah ber an ni. Chawnpui hi MPL champion lai an ni thung a, coach Lalrindika Hmar an lalut ringawt lo - a hman theih tur player an lakluh telsak.

Tun dinhmunah I League club tan Lalrinzuala a khel ṭha tluang zel a, Serchhip tlangval hian I Day Football-ah goal nga a khung hnuin MPL10-ah goal li a khung tawh. Mizoram Police pawhin Rinzuala hi an veng hneh lo a, Chawnpui FC tan pawh ven uluk a ṭul dawn.

Tun season-ah Chawnpui leh Aizawl FC hi an la inkhel lo a; I League club tlarhma dang turin MPL best defender ni lai Lalruatfela leh Lalhmangaihsanga te an pawimawh dawn. AFC tana chanchin lawmawm chu R. Lalthanmawia (Amawia) a dam tawh a, Lamzawl tlangval hi bul ṭan thei dinhmunah a ding.

Coach inbeihna

1st Bn MAP Ground-a MPL round thum khelhna a ni tawh a, club-te pawhin field awm dan an hrethiam ṭan. Coach te pawhin an khingpui tur leh an khelhna hmun milin player an thlan thiam a ṭul ang.

Aizawl FC hi coach Victor Lalbiakmawia'n a telpui thei tawh dawn a, chutihrualin nimin thlenga training-na hmuna team uaptu Sawmtea nen technical area-ah an awm dun ang.

I League club hi squad chhah mah se match hnuhnung bera Police an hneh avangin player an siksawi a rinawm loh. Midfield-ah pawh tawnhriat nei ṭha pathum Lalramsanga, K. Lalrinfela leh KC Larchhuakmawia te an awm nawn a rinawm.

Chawnpui FC hian match hnuhnung berah vawi thum chak zawn tawh Chanmari FC an chelh a, goal an chhuah lo. Chawnpui leh Chanmari inkhel hi MPL10-a inkhel la hmuhnawm ber ang hiala sawi a ni a ni a, chutihrualin vawiina Chawnpui leh Aizawl FC inkhel tur hi a nep bik lo ang.

Midfielder Lalbiakzuala (BZ-a) leh striker David Lalchhuanawma te registration fel loh vanga match hnuhnung ber an khelh theih loh hnuin Aizawl FC an hmachhawn thei dawn a, Chawnpui tan chanchin lawmawm a ni.

Chawhnu dar 2:00-ah Police Vs Chanmari

Mizoram Premier League awm hnuah Mizoram Police leh Chanmari FC inkhel a nung ziah. Zote Toyota MPL10-ah vawiin chawhnu dar 2:00 hian club ṭha pahnih hi 1st Bn MAP Ground-ah an inkhel dawn a, tuna team dinhmun avangin inkhel hi a hmuhnawm sawt ang.

K. Malsawmkima kaihhruai Chanmari FC hian chak loh an la nei lo a, league hmahruaitu an ni mek. Mizoram Police erawhin an practice-na hmun 1st Bn MAP Ground-ah chak hmel an la hmu lo a, palinaah an inham tang hram. Lalbiaksanga Colney hote hian Chanmari FC an hneh lo a nih chuan 'pressure' an nei ṭan ang.

Police coach BS-a Colney hian Aizawl FC an hmachhawn ṭumin tawnhriat ngah zawk Malsawmfela, R. Malsawmtluanga leh Lalbiakhlua (Hlutea) te bench-ah a dah a, I League club lakah goal khung hmasa mah se an chak lo. Chanmari lakah hian BS-a Colney hian engtin nge player a rem ang tih hriatthiam a har hle.

I Day Football-ah khan Police leh Chanmari tawpna chu semifinal-a ni a, group khatah an awm loh bawk avangin tun season-ah an la inkhel lo. MPL match hmasa berah khan inkhel se, team pahnihah hian buk rit zawk an awm kher lo ang. Round 5-ah erawh Chanmari buk a rit ta zawk.

Chanmari hi an result a ṭha ringawt lo a, club thuneituten coach Mala an thlawpzia lantir nan player ṭha an laksak. Keeper Zothanmawia (T. Mawia) leh defender Lalrinchhana Tochhawng te an lalut a, position tinah Chanmari an ṭha ta vek.

Team ṭha pahnih inkhel tur a ni bawk a, player ṭha khaikhin tur pawh an tam. Goalkeeper F. Lalmuanawma (Police) leh T. Mawia (CFC) te, defender Lalhmunmawia (Police) leh Rinchhana (CFC) te, forward Lalfakzuala (Police) leh R. Laldanmawia (CFC) bakah Sawmfela (Police) leh Lalkhawpuimawia (CFC) te hi khai khin theih vek an ni. A hmuhnawm loh thei lo.