Hmeichhe Sub Junior football semifinal : Mizoram vs West Bengal

Sub Junior Girls' National Football Championship semifinal chu vawiin tlai dar 4:00 hian Amritsar, Punjab-ah khelh a ni dawn a, Mizoram leh West Bengal te an inkhel dawn. Semifinal pakhat zawkah Jharkhand leh Meghalaya te an inkhel ang.

Mizoram hi team SYS coach pahnih R. Lalnunsangi (Manuni) leh Lizzy Lalhmingsangi ten an kaihhruai a, semifinal thleng tur hian inelna thlengtu Punjab 3-2 in an lehthal. Mizo hmeichhe team tan Champhai Zote naupang Lallawmzuali a khel ṭha a, match thum lekah goal 14 tehmeuh a khung tawh.

Mizoram coach Manuni chuan, "Hun rei lote chhung chauh kan training a, heti chung hian naupangte hian thil zirte thiam hmanin a takah an hmang thei a, kan lawm hle. West Bengal hi kan hneh theih ngei kan inring a, Pathian thu thu a ni. Mizo mipuite ṭawngṭaipuina kan ngen e," tiin Vanglaini a hrilh.

West Bengal hian semifinal lut tur hian an khingpui Haryana, Maharashtra leh Arunachal Pradesh te an hneh vek.