East Bengal-in Durand Cup final an lut

Durand Cup hmáwr bàwk a hnai ta - Thawhlehni zan khan semi-final inkhel hmasa zawkah East Bengal chuan penalty hmangin NorthEast United an pet chhuak a, final an lut.

Salt Lake Stadium-a semi final inkhelah team pahnih hi 2-2 in an inhnehtawk a, extra time khel loa penalty hmanga chak zawk zawn nghal niin, penalty-ah hian Kolkata club hi 5-3 in an chak.

Highlander-in bul an ṭan ṭha viau a, harsa loin final pawh an lut mai dawn niin a lang hman. Minute 22-na lekah Atletico Madrid academy chhuak, tun season-a Highlander zawmtu Míchel Zabaco chuan goal hmahruai a tauh lut.

Zabaco-a'n goal a khung theih nana Manipur tlangval Phalguni Singh assist a tawk hle. Season hmasa I League lama Sreenidi Deccan tana khel Phalguini hian a khung ve leh bawk a, minute 57-naah a belhchhah.

Salt Lake Stadium-a banner nena thawkrip tak East Bengal fan-te an ngawi dak a, semi final-ah inelna an mangṭha dawn niin a lang hman. Mahse, Kolkata club player-te'n club lian zia an chhuah a, tlâwm an duh lo.

Minute 77-naa Mahesh Singh 'shot' chuan Dinesh Singh perin goal-ah a lut a, East Bengal-in beiseina an nei thar. Mahse, minute 90 thlengin goal dang an khung lo a, Highlander an tlang ngei a rinawm.

Mahse, hun pek belh minute sarihnaah Nandhakumar Sekar lo langin, East Bengal si phurh a sût a, thilmak a thleng. NorthEast United tan goal dang khungna hun a awm tawh lo a, penalty an pet zui.

East Bengal tana pettute'n an pet goal vek laiin Highlander tan Parthib Gogoi chuan a chhuih lut thei lo a, penalty-ah 5-3 in East Bengal an chak. Zanin dar 6:00 hian semi final hnuhnung zawkah FC Goa leh Mohun Bagan an intum dawn a ni.