Mizoram Law College ruby jubilee lawm

Mizoram Law College chuan August 25, 2023 khan an college-ah an din champha vawi 40-na, ruby jubilee an lawm a, Law & Judicial minister TJ Lalnuntluanga'n a hmanpui a, souvenir a tlangzarh bakah jubilee lungphûm a hawng.

Law & Judicial Minister chuan, Mizoram Law College (MLC)-in kum 40 a tling chu a lawmpui thu sawiin, "MLC hi Mizote'n dan leh hrai kan hriat theihna atana thawh hlâwk tak a ni a, lawyer leh judge chhuanawm tak tak an lo chhuak tawh," a ti a; zirlaite chu mi dangte tana malsawmna nih tum tur leh rethei leh hausa inkar zau tizím tura theihtawp chhuah turin a chah.

Ṭhalai la naupang tak tak zingah rilru lama harsatna nei an tam chu veiawm a tih thu sawiin TJ Lalnuntluanga chuan, MLC zirlaite chu lehkha zir mai bakah, zirlai tibahlah loa kohhran leh khawtlanga inhman nacháng hre turin a chah a, "Kan ramin mithiam chauh ni loin, mithiam rilru hrisel pú a mamawh a, hemi tur hian nun kan uluk a ṭul hle a ni," a ti.

Dan hre mite chu mite'n dan hnuaia an chanvo dik tak an hmuh theihna tura hma laksaktu an nih thu sawiin Minister chuan, "Dan hriatna hi a dik lo zawnga hman chuan harsatna thlentu a ni," a ti a; ṭha leh dik nia an hriatah huaisen taka an din ngam a ṭul thu leh thil dik loah chuan hamṭhatna beisei loa hnâwl ngam a ṭul thu te, Mizo zingah Supreme Court judge an la awm loh avangin thleng pha thei tura ṭan lak a ṭul thute a sawi.

Law & Judicial Minister chuan, MLC zirlaite chu social media hman chin tâwk nei tur leh inhuatna siam thei angte tarlang lo turin a chah a; tumruhna leh taimâkna nen zir a, hlawhtlinna an chan hnuah pawh mi dangte ṭanpuitu, biak nuam leh hawihhâwm ni turin a fuih bawk.

MLC-ah hian zirlai 187 an awm mek a, zirtirtu 12 leh thawktu dang 16-te'n an enkawl mek a; mi 700 chuangin LLB an zir chhuak tawh a ni.

MLC hi Aizawl Law College tiin August 25, 1983-ah din a ni a, dan lam zirna class hmasa ber chu JL High School, Khatlaah ṭan a ni. September 7, 1983-ah kha tih laia chief minister Brig. T Sailo-in a hawng a, Saingura Sailo chu principal hmasa ber a ni.

July 31, 1996-ah Liandingpuia Law College a ding ve leh a, Aizawl Law College leh Liandingpuia Law College chu Mizoram sorkarin Aizawl Law College registration ring zuiin July 1, 2004 khan a chhûn fin a, Mizoram Law College tih a ni zui ta a ni. MLC hi August 25, 2006-ah deficit grants-in-aid status-ah dah a ni a, September 19, 2013-ah provincialise a ni.