Point thum hmuh kan tum - Victor, AFC coach

MPL-a champion ngun ber Aizawl FC-in vawiin tlai dar 3:00 hian Electric Veng FC an hmachhawn dawn. I Day Football-a an inhmachhawn ṭumin I League club hian 3-0 in an hneh a, Aizawl FC coach Victor Lalbiakmawia chuan point thum hmuh ngei an tum thu Vanglaini a hrilh.

Aizawl FC hi team ṭha zawk an nih avangin point thum hlawhchhuah loh hi mualphona a ni dawn a, chutihrualin chak thei turin squad a chhah ṭha bawk. I Day Football final-a inhliam Lalrinzuala a dam leh tawh a, Serchhip tlangval thlawptu turah duhthlan tur an ṭhahnem.

Tualchhung football ngainatute tan AFC goal nawr hi hmuhnawm a tling a; mual sirah player tlan chak R. Lalthanmawia (Amawia), Augustine Lalrochana leh Lalbiakdika bakah winger rintlak R. Ramdinthara (Tharpuia) te an awm.

HK Lalhruaitluanga erawh winger ni mah se I Day Football-ah right back atan chhawr a ni a, a khelh ṭhat êm avangin Hruaitea hi right back-ah a awm chhunzawm a rinawm.

Electric Veng pawhin Aizawl FC ṭhatzia an hria a, I League club hmachhawn tura an ruahmanna chu 'pressure pek' a ni dawn - hei tak hi a hmuhnawm lai tur a ni. Coach Francis Rambeiseia chuan, "Kan player-te hi naupang tê tê an ni a, defensive third-a lo veng tawp tur chuan kan tlin dawn lo. Hei vang hian an defender-te ball inpe tur thlengin pressure pek kan tum a, chumi tur chuan kan fitness pawh a ṭha," tiin Vanglaini a hrilh.

EFC hian I Day Football hnuah FC Venghnuai aṭangin B. Lalrosanga (Bawiha) an la lut a; tlarhmaah C. Lalhriatpuia leh KC Malsawmsanga te chu an hmachhawn tur an ni ang. Electric Veng hi Aizawl South FA nen an inthlunzawm a, player naupang rual anga sawi theih an ni.