MPL 10 bul ṭanna; champion lai Chawnpui vs Project Veng

Mizoram Premier League Season 10 kan nghak chhuak ta. Vawiin chhun dar 12:00 hian match hmasa berah champion lai Chawnpui FC leh kai thar Project Veng FC te an inkhel dawn.

Chawnpui FC hi champion lai ni mah se season liam ta nen chuan an danglam ta hle. Coach Lalrindika Hmar hnuaiah team thar an din a, I Day Football aṭanga thlir chuan nomawi humhim chu sawi loh semifinal thlen phak pawh a harsa dawn.

I Day Football-ah khan Chawnpui FC hian semifinal an thleng zo lo a, vawiina an hmachhawn tur Project Veng FC hi an hneh awmchhun an ni. Rindika Hmar hote hian Kolasib club hneh tur hian vanneihna an mamawh a, injury time-ah Peter Lalrinhlua'n goal awmchhun a khung.

Chutihrualin inkhel dang thlir chuan Chawnpui FC hi Mizoram Police lakah hnehna chang thei tur an ni thung a, ṭum hnih ngawt hmahruaitu ni mah se an inlehthaltir. Referee-in Police penalty a pek danah Chawnpui coach Rindika a lawm lo hle.

Season liam taa Lalsangzuala Hmarin Chawnpui FC a enkawl pawh khan I Day Football-ah semifinal an thleng zo lo a, an champion ta tho. Hei hi Chawnpui tan fuihna ṭha a ni a, group stage an paltlang lo hi tumruhna leh thawhrimna petu a ni thei bawk.

Kolasib club Project Veng FC hi dah hniam chi an ni lo. I Day Football-ah chak lo mah se game hmuhnawm an khel a, coach ṭha an neih bakah training-na tur ground an nei ṭha tih a chiang.

Project Veng coach R. Lalrammawia (Patea) chuan, "Club budget nei tlem ber kan ni hial ang. Hei vang hian player mimala innghahna tur kan nei ve lo a, thawhrimna leh thawhhona ṭha hi kan chhuan tur a ni," tiin Vanglaini a hrilh.

MPL kai thar hian tlarhma tih chak nan Sikkim-a Khawzawl Vengthar champion puitu striker Lalkrawsmawia an la lut. Sihtlangpui tlangval Mawitea hian final-ah goal hnih a khung a, a khalh tlang zawk phei chu pui tak a ni. MPL-ah a ti thei leh dawn em, tih chu Chawnpui lakah a hriat ang.