Chawnpui FC-in jersey tlangzarh

MPL champion lai Chawnpui FC chuan August 22, Thawhlehni zan khan Woodland Hills, Zonuamah tun season-a an hak tur jersey tlangzarhna hun an hmang. Chawnpui FC hi Lois Bet-in a sponsor a, Lois Bet neitu Lalthlamuani'n jersey hi a tlangzarh.

Chawnpui hian season dang ang thoin jersey eng an ha leh dawn a, jersey tlangzarhna hun hi Er C. Malsawma'n a kaihruai. Chawnpui FC hian season liam ta khan MPL final-ah FC Venghnuai hnehin an champion a, tun season-ah champion nawn tumin coach langsar Lalrindika Hmar an la lut. Rindika Hmar hi Lalthantluanga'n (T2-a) a pui ang.

MPL champion lai hian best defender Lalruatfela an la chelh thei a; MPL-a tawnhriat nei ṭha Vanlalthanga, David Lalchhuanawma, Lalruatfela (RF-a) leh Vanlalremkima (Tetea) te an la lut bawk.