MPL10 - Eng nge kan beisei theih ang?

Mizoram chhunga football inelna sang ber Mizoram Premier League chu August 25, Zirtawpni aṭangin RG Stadium-ah khelh ṭan a ni dawn. MFA leh Zonet buatsaih inelna hi kum 10-na tur a ni a, season kua teuhmeuh khelh a nih tawh avangin MPL aṭanga India rama football inelna sang Indian Super League leh I League-a khel tawh player pawh an ṭhahnem hle.

Covid-19 vangin inelna khaihlak ṭum a awm a; player tawnhriat ngah an chawl a, player thar an chhuah bawk avangin MPL9 kha hriatthiam har ber ṭumah a ngaih theih. Kumin inelna pawh hi hriatthiam a la harsa nachungin I Day Football leh thil kal tawh aṭanga thlir lawk leh beisei theih dan a awm thung.

Coach inbeihna

MPL history-a coach inbeihna lar ber chu T. Vanlalhluna leh H. Vanlalthlanga te inbeihna kha a ni a, tun thleng pawhin Dinthar FC leh Chanmari FC inelna ang kha a la awm ngai lo. Khelmual chhung leh pawnah club pahnih kha an kal fawr a, kum 10 liam ta a ni tawh nachungin Maimawms leh Chanmarians boruak kha chu tualchhung football ngainatute tan theihnghilh phal chi a ni lo.

Tunah chuan Mizo coach ropui Hluna'n mual min liam san tawh a; engtikahmah Hluna vs Thlanga boruak nung ṭha tak kha a thleng tawh dawn lo. Chutihrualin hun mil zelin inher rem a ṭul a, eizawnna atana football thlang an ṭhathnem avangin 'rilvary' thar hi chu a awm dawn.

Kumin MPL-ah coach sulhnu nei ṭha Lalsangzuala Hmar (Chhinga Veng), Lalbiaksanga Colney (Mizoram Police) leh K. Malsawmkima (Chanmari FC) te awm tur ringawt pawh hi chanchin lawmawm a tling. Coach Sanga hian MPL-ah club pathum a champion pui tawh a; coach Mala hian MPL-a Aizawl FC a champion pui tawh bakah I League-ah AFC a kaipui a, National Games leh NorthEast Games-ah Mizoram chu gold a lakpui ve ve tawh bawk.

BS-a Colney hian I Day Football-ah Mizoram Police a champion pui a, a vawi khat nan Mizoram Police chu All India Police Meet-ah a champion pui bawk. Coach pathum hian team lian vek an enkawl dawn a, chhuanlam siam a thiang dawn lo.

Coach la naupang zingah Lalrindika Hmar-in tun hnaiah hming a chher nasa a, Chawnpui FC enkawlin player ṭha an pe. Aizawl FC hi Victor Lalbiakmawia'n a enkawl mek a, coach Victor hian I Day Football final-a Chhingcows an hneh loh avangin tualchhung football-ah nomawi lian tham a la chawi lo. Mahse, Victor-a hian club ṭha ber I League club AFC a enkawl tih hriat a ṭha.

A awlsam dawn lo

MPL hi Aizawl khaw pawn club tan a harsa ṭhin a, Kolasib club Project FC tan pawh a harsa dawn. Mizoram chhungah inkal pawhna a la ṭhat tawk loh avangin khawdang club tan kartina match neih hi a awlsam lo. MPL1-ah Reiek club Reitlang FC an tel a, anni erawh Aizawl aṭanga darkar khat vel lek kal a nih bakah tualchhung football hrechiang Chawngthansanga'n a enkawl avangin season hmasa berah an him. A hnu lamah erawh Reitlang ni loin Zo United a ni ta zawk a, Aizawl club-a chhiar an ni ta thung.

Lallianzuala Chhangte hoin Lunglei FC-in MPL an inpetkai a, India international player ni ta LZ Chhangte erawhin a khel chhunzawm lo. Lunglei FC-in player ṭha nei bawk mah se player-te an zin tam avangin hahdamna hun ṭha an nei ṭhin lo. Match 14 khelhah Lunglei FC-in point li chauh an hmu. Project Veng FC pawhin a harsatzia an tem tawh. I Day Football-ah Kolasib hian match thumah point an hmu lo a, MPL10 atan hian ruahmanna ṭha an nei a nih loh chuan talbuai thei an ni.

Player ṭha

MPL hmasa bera top scorer ni thei MS Dawngliana a la ṭha reng a, Dawngtea hi MPL10-ah Chhinga Veng captain a ni dawn. MPL hmasa ber best player R. Laldanmawia pawh a rawn kir a rinawm a, Chanmari FC kawr ha tura ngaih a ni.

I Day Football aṭanga thlirin MPL-a mimal chawimawina dawng tawh R. Malsawmtluanga, Malsawmfela, Lalbiakhlua (Biaktea) leh F. Lalmuanawma te Mizoram Police tan player pawimawh an ni vek.

Chutihrualin inelna hnuhnung bera best forward leh top scorer ni lai MC Malsawmzuala a la awm lo a; Siaha tlangval hi Chhinga Veng kawr ha tura ngaih a ni. MC-a hi season zawna top scorer ni thei a ni a, a hming lam hmaih a thiang lo.

Player chhuak thar pawh an awm dawn. I Day Football-ah Lalnunzira chu best player-a thlan a ni a, Zirtea tan tun season hi MPL vawi hnih khelhna tur chauh a ni. Aizawl FC striker Lalrinzuala hi season liam ta khan Chhinga Vengah a khel a, damlohna vangin match tam zawk a khel lo - kuminah a theihna hmuhin a awm ang.

Upset a awm dawn

MPL Board-in phase 1 bik fixtures a tihchhuahah round hmasa pahnih RG Stadium-a khelh tur a ni a, Kolasib-ah round khat khelh tur niin round dang pali chu 1st Bn MAP Ground-a khelh tur a ni.

1st Bn MAP Ground hi a len loh avangin club te zawk tan club lian zawk laka point hlawhchhuah theihna remchang a ni thei ang. Ground thar hman tur hi MPL tingaihnawmtu pakhatah a ngaih theih.

Kumin MPL-ah hian Aizawl FC, Chhinga Veng FC, Chawnpui FC, FC Venghnuai, Mizoram Police, Electric Veng FC leh Chanmari FC te an inel dawn. I Day Football-a semifinal lut pali AFC, Chhinga Veng, Police leh Chanmari te hi 'Big 4' a chhiar ngawt a rem bik lo, a chhan chu MPL9 final-a inhmachhawn chu Chawnpui FC leh FC Venghnuai an ni.