AFC Cup-ah Bagan an chak

Asia khawmualpuia club football inelna sang ber dawttu AFC Cup 2023 preliminary round two-ah Mohun Bagan Super Giant chuan hnehna an chang a, 3-1 in Nepal club Machhindra FC chu an hneh.

Bagan tan defender thar Anwar Ali chuan goal hnih a khung a, Jason Cummings chuan goal khat a thawh bawk - Nepal club tan Afeez Oladipo chuan goal khat khung ve mah se awmzia a nei phak lo a, a tawpah 3-1 in Bagan an chak.

Kolkata club tan group stage khel phak tur erawh chuan match khat chak leh phawt a ngai dawn a, playoff round-ah Bangladesh club ṭha Dhaka Abahani nen an inkhel ang - hnehna an chan chuan group stage an khel ang.

Hetihlai hian ISL club tho Odisha FC chu AFC Cup khel tura tling chiang sa an ni a, anni hian Super Cup 2023 nomawi an chawi hnuah I League (2021-22) champion Gokulam Kerala chu Indian club playoff-ah hnehin group stage an tling a ni.

ISL 2022-23 champion Mohun Bagan hian 2021-22 champion Hyderabad an hneh thung a, hei vang hian AFC Cup hi preliminary round two aṭangin an khel ṭan.