Chelsea sum sen a tam - danin a huam lo em ni?

Saudi Pro League lam sum sen hnem dan chu sawi loha leng a ni. Mahse, anni erawh European football inkhuahkhirhna hnuaia awm an nih miau loh avangin an duh ang sum seng turin zalenna an nei a, mahse, Chelsea hi heti zat sum an seng reng mai hi, engtin nge danin a phal zawk, tia zawhna tam tak a awm.

Todd Boehly leh a thawhpuiten season hmasa ṭan dawn khan Chelsea hi an lei a, Transfermarkt lamin an tarlan dan chuan Boehly-a'n Chelsea a lei hnuah player lakluh nan pound maktaduai 800 vel zet an seng tawh a, anmahni hnaih bertu Manchester United aiin £430mtd-in an seng hnem tawh zawk!

Tun nipui transfer-ah pawh Blues hian British transfer record fee thar siamin, Brighton & Hove Albion midfielder Moises Caicedo chu £115mtd-in an lei - record an khum tak i hre duh em? Thla ruk liam taa anmahni siam tho a ni a, £107mtd-a Enzo Fernandez an lakluh kha a ni.

Hei mai a ni lo - Blues hian Southampton midfielder Romeo Lavia (£53mtd) chu la lut turin inremna an neihpui tawh bawk a, he thuziak i chhiar meuh chuan an in la lut fel tawh hial mai thei. Hetihlai hian £35mtd-a an ngam Crystal Palace winger Michael Olise erawhin Palace-ah kum li dang cham turin contract thar a ziak zawk.

An seng hnem

Chelsea hian tun nipuia player lei nana an sen tawh zat chu £270mtd a ni a, player pasarih an la lut tawh. Kum 2019 khan Real Madrid chuan £292mtd hmangin, nipui transfer-a sum hmang hnem ber record an siam a, Blues hian an player lakluh turte an la lut a nih chuan record thar an siam ngei dawn tihna a ni.

Blues hian season hmasa ṭan dawn khan £260mtd player lakluh nan an seng a, January thla khan £288mtd an seng bawk - Brighton lama bazar hi nuam an ti laklawh a, he club hnena player lakluh nana sum an pek zat ringawt hi £175mtd a ni. Chelsea tan player an lo chher hriam a ni ber!

Chelsea-in Brighton hnena sum an pek kan tihah hian Seagulls (Brighton sawina) manager Graham Potter chhuhsak tura zângnadawmna £21mtd an pek a la tel lo zawk - Boehly-a'n Chelsea a lo lei kher hi chu Brighton tan vanneihna a ni.

Chutihrual chuan Blues hian player hralhna aṭangin sum an la lut ve tho a, Boehly leh a thawhpuiten transfer vawi thum an hmachhawn tawha player hralhna aṭanga an sum hmuh zat chu £280mtd vel a ni - hetihrual hian kum tam tawh, hlawh hnem bawk si ang chi Kalidou Koulibaly, Mateo Kovacic leh Cesar Azpilicueta te ui loin an chhuahtir bawk.

Engtin maw?

Club-ten sum tam tak nei mah se an duh zat zat an sen ngawt a thiang lo a, UEFA leh ram tin league ten sum sen theih dan chinah phal chin an nei vek - hei hi club kal zelna tura club him zawk nana tih a ni a, club tluchhe tur venna a ni ber.

Premier League danah chuan, club-in kum thum chhungin £105mtd aia tam a hloh a thiang lo a, hetiang zat hi club-in lo hloh ta se sum chawitir emaw, point paihsak thlengin emaw hrem theih an ni.

UEFA chuan sustainability rules tih a nei a, hei hi UEFA hman ṭhin Financial Fair Play (FFP) thlakna a ni a, club-te chu player hlawh, transfer leh agent fee-ah kum thum chhunga an sum lakluh aṭanga tehin, 70% aia tam an hman a thiang lo.

Mahse, he dan hi kum thum chhung zawi muanga kalpui tur niin, tun season-ah chuan 90%, season tharah 80%, 2025-26 season-ah 70% hi hman ṭan chauh tur a ni.

A huam lo

Chelsea hian UEFA hnuaia inelna an hmachhawn dawn loh avangin European football thuneitu sang dan duan hian a huam lo hrim hrim - tun season-a European football an khelh loh tur hi malsawmnaah an chantir a ni ber mai!

Hei vang hian Blues tan hlauhthawn tur awm chu Premier League dan chiah a ni a, chu lah 'hel' dan an zawng fuh tlat! Entirnan, Mykhailo Mudryk an lei khan Blues hian £89mtd seng mah se, kum riat leh a chanve contract an ziahpui.

Chumi awmzia chu Chelsea hian Mudryk leina kha ṭhen sawm lehin, season khatah Mudryk lei nan £10mtd bak an seng lo tihna a ni a, chu chuan club sum sen kha tlem tak angin a tilang thei.

UEFA-in dan thar siamin, kum nga bak player tan contract a ziah theih loh ti mah se, Blues-in European football an khelh loh miau avangin hei pawh hian Chelsea hi a huam lo.

Player hralhna

Club-in player an hralh reng rengin, an hralhna sum chu club account-ah hlawkna anga ziah luh nghal ṭhin a ni a, an hralhna sum zawng zawng erawh a ni lo. Blues-in kum 2020 khan £71mtd-in Kai Havertz an lei a, kum nga contract-a ṭhensawm chuan kum khata £14mtd vel seng zel ang an ni.

Tun nipuiah Havertz hi Blues-in £65mtd-a an hralh khan, a contract ang chuan kum hnih a la neih avangin £28.4mtd hlutna a la nei - hei hi £65mtd aṭanga paih leh niin, £36.6mtd kha hlawkna chu a ni a, chu chu Chelsea account-ah chuan hlawkna angin a inziak.

Academy player an hralh hian club tan chuan hlawkna hlang a ni a, Mason Mount-a'n Stamford Bridge chhuahsana Manchester United a zawm khan a man zat £55mtd chu Chelsea account-ah chuan sum zawng zawng hi hlawkna angin tarlan a ni.

Player contract rei tak pek piahlamah, an players hralhna hmang hian Chelsea chuan Premier League dan bawhchhe lo turin hma an la a, mahse, hei hian a chhan thei reng ang em, tih chu hunin a la hril tur a ni.

A him em?

Zawhna pawimawh ber chu, Chelsea hmalak dan hi a him em? tih hi a ni - Blues hian 2021-22 season khan £121mtd an hloh a, a hma leh season-ah khan £156mtd an hloh bawk. Roman Abramovich hnuaiah khan dan an bawhchhiat avangin £8.57mtd an lo chawi tawh.

Blues tana tuna an him theihna pakhat chu sum hailuh dan ngaihtuah a ni - player hralhna, sumdawnna lam tih leh leh prize money tam zawk hmu tura beihte chu an tan kalkawng a ni a, a awlsam lo mai thei.

Sports journalist lar Rory Smith chuan, "Player-te contract rei tak ziahpui chungin, dan awm laia a ṭha tawk lo lai chu remchangah an hmang a ni. Accounting trick ṭha tak a ni a, mahse, an ziah angin sum erawh inpek a ni si lo.

"Caicedo man hi vawi kua an pe dawn lo a, a tam berah vawi thuma pek tlakah an nei hial ang. Hetianga an che a nih chuan loan kaltlangin thil an ti pawh a ni mai thei a, club enkawl dan tura thil ṭha chu a ni lo," a ti a, Chelsea chet dan chu a him loh thu a sawi.