GIG Motors I Day Football 2023: Sanga hoin Chhinga Veng an champion

I Day Football 2023 final a hmuhnawm a, Chhinga Vengin team ṭha bera ngaih Aizawl FC chu penalty shootout hmangin an hneh. RG Stadium-a inkhel hmuhnawm bikah hian hun pangngaiah 2-2 in an inhnehtawk a, penalty shootout-ah Chhingcows keeper RS Lallawmzuala chu 'hero' a ni.

Coach Lalsangzuala Hmarin a record ropui tawh sa chu a belhchah a, tun ṭum hi I Day Football-a Chhinga Veng a champion puina a ni. Inelna hnuhnung pangaah Sanga kaihhruai team hi vawi li an champion a, Chhingcows vawi thum a champion pui bakah Electric Veng a champion pui bawk.

I League club an hmachhawn miau avangin Sanga hote hian champion turin vanneihna an mamawh a, 2-1 in hun rei zawk hmahruaitu ni mah se hun tawp hma chiahin Lalnunzira'n siphurh sutna goal ṭha bik a khung. Republic Veng tlangval Zirtea hi best player-a thlan a ni.

AFC an thiam

Kumin I Day Football ṭantirh aṭangin player ṭha rual awm khawmna Aizawl FC-in team ṭha bik an nihzia an pholang a, final-ah pawh an ṭhatzia hmuhin a awm. I League club hi hun chanve hma lamah an chungnung hret a, Serchhip tlangval Lalrinzuala hmangin an phu angin first half injury time-ah an khung hmasa.

Second half ṭantirhah pawh an che ṭha zawk a, minute 53-naah HK Lalhruaitluanga ball pek chu Rinzuala'n goal-ah a pet a, goal hmaa ding, R. Lalthanmawia'n a hnunga awm K. Lalrinfela tan a siamsak. Hnahthial tlangval hian chiang zetin a pet goal.

Aizawl FC hi nuamsa taka chak tura ngaih ni mah se minute khat pawh tling loah an chesual a, midfielder rintlak Lalramsanga back pass sual chu Suanngaihmuana'n chang fuhin ṭha zetin a pet goal. Chhinga Vengin beiseina an neih phah.

Zirtea leh Lawma

Aizawl FC an insiamrem a, Chhinga Vengin MS Dawngliana, Amuana leh subsitute Isac Zomuanpuia te hmangin nawr ve bawk mah se Aizawl FC defender Lalmuanawma (Munez) leh a ṭhiante an ding khawng ṭha hle.

I League club hi ṭang tluan tura ngaih an ni tawh a, injury time minute linaah AFC forward Lalbiakdika'n Chhingcows midfielder Zirtea lakah freekick hlawh chhuakah inngai mah se referee-in BD-a chu tisual hmasa zawkah a puh. Chhinga Vengin freekick hi an hmang ṭangkai a, hemi aṭanga ball kal zel chu Zirtea'n box pawn aṭangin ṭha zetin a pet goal.

Zirtea hian Chawnpui lakah goal ropui a lo khung tawh a, coach Sanga'n tun inelnaah no. 6-ah chhawrin a hna a tlin viau bawk. Extra time khelh a ni a, AFC forward R. Ramdinthara'n keeper chauh a hmachhawn hnuah a ti goal - keeper Lawma'n a dang ṭha ve bawk. Hemi hnu hian Mafela'n hnai tak aṭangin a hlah bawk.

Minute 120 chhungin chak zawk an awm lo. AFC hian penalty shootout-a veng tur hian CYMA Football 2023 best keeper Joel Lalramchhana an rawn luhtir. Aizawl FC-in an pet hmasa a, Lawma'n AFC forward BD-a pet a dang nghal. Hruaitea pet pawh a ring dik a, goal ban a per thung. AFC lama pettu hmasa pahnihin an hlah a, Munez leh Amawia te pet goal vangin beiseina nei bawk mah se keeper Lawma'n Rohminga pet dangin Chhinga Veng a chakpui.