Brazil-in World Cup an thlah

Hmeichhe World Cup khelh mekah Brazil tan beisei tur a awm tawh lo - nimin khan Jamaica nen 0-0 in an inhnehtawk a, kum 28 chhunga a vawi khat nan World Cup knockout round an khel dawn lo.

Tun tournament-a beisei phak lo Brazil tan kum 37 mi Marta chuan inkhel bul a ṭan a, mahse, World Cup-a goal 17 zet khung tawh striker hian an ram team a chhan thei bik lo - Brazil an tla a, Jamaica-in a vawi khat nan World Cup round of 16 an khel dawn thung.

Group F inkhel dangah France chuan 6-3 in Panama an hneh a, group hmahruaitu ni chungin last 16 an lut. France tan Kadi Diani chuan hattrick siamin, a goal khung zinga hnih erawh penalty aṭanga a chhuih luh a ni.

France tan Maelle Lakrar, Lea le Garrec leh Vicki Becho ten goal khat ṭheuh an khung bawk a, Panama tan Marta Cox, Yomira Pinzon (penalty) leh Lineth Cedeño ten goal khat ṭheuh khung ve mah se an tan France an lian hret.

Panama hian minute hnihna lekah goal hmahruai an khung hial a, France-in goal ngaa an chhanlet hnuah pawh goal hnih an khung ve leh hram - beiseina an nei hman a, mahse, Becho chuan France tan hun pek belhah khung lehin, chak a nemnghet.

France hian last 16-ah group H pahnihna an tawng dawn a, Germany emaw Morocco emaw an ni ang - Colombia chu group hmahruaitu ni tura ngaih an ni a, Jamaica nen an intawng thung ang. Hmeichhe World Cup group stage match hi vawiinah khelh zawh a ni dawn a ni.