GIG Motors I Day Football 2023 Final tenau: FC Venghnuai Vs Chanmari FC

GIG Motors I Day Football 2023 group A aṭangin Aizawl FC-in semifinal an luh ngei a rinawm a, nikum finalist hian knockout stage an lut dawn a nih si chuan FC Venghnuai, Chanmari FC leh Electric Veng FC ten hmun ruak pakhat an inchuh dawn.

Vawiin chawhma dar 11:00 hian RG Stadium-ah Venghnuai leh Chanmari an inkhel dawn a, heta chak lo zawk hi tla thei dinhmuna an din avangin inkhel hmuhnawm bik a ni dawn. Inkhel hi Zonet Zawlbuk leh YouTube channel-ah live a ni.

Boruak a hot

Chanmari FC hi inpuahchahna nei ṭha an nih bakah an duh ang player thlang tih theih an ni a, team sheet en mai chuan FC Venghnuai aiin an buk a rit. Mahse, Venghnuai hian Electric Veng 3-1 a hnehin point thum an nei tawh a, Chanmari erawhin point an la hmu lo.

Fixture vangin inkhelh dan kalhmang a dang hret dawn. Venghnuai tan goal venhim a ngam awm a, Chanmari tan erawh attacking game khelh ngei a ngai thung. I Day Football atana inpuahchahna nei ṭha ber K. Malsawmkima hote hi match hnih khelh zawhah tla thei dinhmunah an ding a, anni tan chuan final tenau a ni ber.

Chanmari ṭha zawk

Chanmari FC han tih chuan an len hmel a, an coach pawh MPL champion tawh Mala a ni. Mahse, an player-ah MPL-a hming chher tawh an tlem a, tawnhriat an ngah tawk lohna hi Aizawl FC lakah pawh a lang tawh.

Defender tawnhriat nei ṭha K. Lalthlahlova (K. Patea) an la lut chungin match hmasa berah goal li ngawt an chhuah a, goalkeeper buaina an la chingfel lo niin a lang. Tlarhma lamah season liam taa Chawnpui champion puitu Laltlanzova (Zozoa) an nei a, match hmasa berah erawh Champhai Kanan tlangval Zozoa hi a hriam lo.

Venghnuai lakah Lalkhawpuimawia'n (Mapuia) bul a ṭan tawh a rinawm a, tawnhriat nei Kelkang striker hi danglamna thlen theitu tur a ni. Chutihrualin an tlarhnung erawh an rem phui a ṭul dawn.

Venghnuai an te lo

Chanmari hi hming lian zawk ni mah se tun hnaiah erawh Venghnuai hming a lian zawk. MPL9 finalist an nih bakah CYMA Football hnuhnung berah an champion a, MPL U18 hnuhnung pahnihah an champion bawk.

Venghnuaiin centre back C. Ramdin-mawia chu captain-ah an hmang a, Armed Veng South tlangval Ramdina leh a hote erawh insiamṭhat an la mamawh thung. Counter attack an tum a nih pawhin Venghnuai hian a ti thei tur player an nei a, C. Ngurnuntluanga leh Vanlalhruaia te hmangin mualsir kil hnih aṭangin an nawr thei ve ve.

Season liam ta aiin Venghnuai hi tun season-ah an tlak hniam hret a rinawm a, chutihrualin tun hnaia result ṭha an neih avangin player-ten tawnhriat an nei ṭha a, hun harsa paltlang dan an thiam tlat tawh.