World Cup 2026: India tan beisei tur a awm em?

World Cup an khel zo chauh a, Lionel Messi hoa Argentina lawmna au thawm pawh a reh fel tak tak hmain khawvelin World Cup dang a hawi lehnghal der tawh - World Cup 2026 chu!

"Khawvela ennawm ropui ber," tih hialin hming lem an pe a, khawvelin World Cup a ngaihhlutzia inhrilh nawn a ngai lo. Mizoramah pawh World Cup a thlen meuh chuan meng rei lo chhungkua pawh an meng rei a, mahni in luma inkhel en thei rengte pawhin ṭhiante leh ṭhenawmte in kan pan a, a huhoa en nuam kan ti bik tlat ṭhin a nih kha.

Hei hi World Cup zunzam chu a ni a, a mi phuar hi na tak a ni - heti taka khawvelin a ngaihsan ennawmnah Mizo tlangval tan pawh kawng hawnin a awm ṭan ta a, Canada, USA leh Mexico-in an inthlen ṭawm tur World Cup 2026-ah hian Mizo tlangval a inlan lo ang tih tu nge sawi thei?

Mahse, chumi tur erawh chuan India-in World Cup a khelh phak phawt a ngai a, chu zinkawng tur chu tunah chuan duan fel a ni leh ta - group A-ah Qatar, Kuwait leh Afghanistan/Mongolia te nen an awm ho.

Beiseina siamtu

World Cup 2026 aṭangin World Cup-a inel ṭhin team zat chu tihpun a ni a, team 32 inelna ni ṭhin chu team 48 inelna a ni dawn a, 4.5 hmun ruak nei ṭhin Asia pawhin 8.5 ang a nei tawh thung.

Chumi awmzia chu qualifier aṭanga direct taka World Cup-a inpettling thei chu ram pariat an ni ta tihna a ni a, inter-confederation playoff kaltlangin hmun ruak pakhat a la hauh leh tho bawk.

A tawi zawnga sawi chuan Asian khawmualpui aṭanga World Cup khel thei ram chu ram pali hmanga tihpun a ni a, Asian football powerhouse-te tan chauha beisei ngam ṭhin World Cup pawh ram dang tan pawh beisei ngam a ni ve ta.

Hetiang boruak karah hian football khawvela ṭhanharh lam pan mek Indian football fan-te pawhin beiseina thar an nei a, World Cup 2026-ah chuan 'Jana Gana' hla an play ve ngei an beisei - beiseina chu neih thiang alawm!

Tih ṭhat lawmman

India-in tun international break-ah Hero intercontinental Cup leh SAFF Championship an khel a, Blue Tigers hian champion nomawi an chawi ve ve a nih chuan FIFA ranking-ah top 100 chin an kai dawn tih an hria.

Top 100-a kai a ni satliah lo. Blue Tigers hian July thlatira FIFA ranking-a 100 chung lam an luah hman chuan qualifier draw-ah pot 2-ah an awm dawn tih an hria a, hei hi thil ṭha tak a ni.

A chhan maw? India hi pot 3-ah awm ta se, Pot 1-a Asian football powerhouse kan tih ho Japan, South Korea, Australia, Saudi Arabia leh Asia-a inkhelh thiam ram hrang hrang bakah, pot 1 chang pha chiah lo, mahse, han dak vuai vuai Uzbekistan, China, Jordan, Bahrain, Syria etc. te nen group khata awm hona chance a sang dawn.

Mahse, India-in nomawi a chawi ve ve a, World Cup qualifier draw neih laia top 100-a a awm hman avangin pot 2 a chang a, qualifier draw-ah a vannei zui - group A-ah Qatar, Kuwait leh Afghanistan/Mongolia te India-in a chang thei.

A ṭha maw?

Qatar hi Asian champion an ni a, chutihrual chuan pot 1 aṭanga thlan theih team en vang vangin, Japan, South Korea, Iran leh Australia te chang loa Qatar chan hi India tan vanneihna tiin a sawi theih.

Afghanistan leh Mongolia te hian first round qualifier an khel phawt ang a, inkhela chak zawkin second round an lut ang - hei hi India team khelh ṭanna tur round a ni a, Afghanistan leh Mongolia inkhela chak zawk hian group A-ah India an zawm dawn a ni.

Team pali hi home & away-in an inkhel kual vek ang a, group hi pakuaa ṭhen niin, an inkhelh kual vek hnua group tina a sang pahnih chuan third round an la lut leh dawn a ni - India tan Afghanistan leh Mongolia-ah huphurhawm an awm lo a, khawi emaw zawk zawk pawh tlang se, India tan harsatna a awm lo ang.

Chutihrual erawh chuan Kuwait hi mahni tuala vawi hnih an hmachhawn, hun pangngaiah chuan an inhnehtawkpui, penalty hmanga an hneh zui tak an ni a, India tan Qatar hi elpui tur chuan a sang hreta kan hriat pawhin Kuwait chu elpui ber tur niin an lang.

A zinkawng

India hian second round paltlang ta se, qualifier third round an lut a, AFC Asian Cup 2027 khel turin an tling nghal bawk ang - India tan kawng zau taka hawnin a awm, tiin a sawi theih.

Third round-ah hian group pathuma ṭhenin, group tinah team paruk zel an awm ang. Group tin hi home & away in an inhmachhawn leh ang a, third round-a group hmahruaitu leh pahnihna zawng chu World Cup khel turin an tling nghal ang.

World Cup khel tura la tling zo ve rih lo, third round-a group tina pathumna leh palina te chu fourth round-ah group pahniha ṭhenin, team pathum ve ve awmin siam rem leh an ni ang - tun ṭum erawh a tihdan a dang

ta thung.

Fourth round-a group pahniha team te ṭheuh hi home & away-a khel tawh loin, neutral venue (ṭantu bik awm lohna) ah vawi khat ṭheuh an intawng ang a, group pahniha a sang zawk pahnih hi World Cup khel turin an tling ang.

Group pahniha pahnihna ve ve hian fifth round an la lut cheu dawn a, fifth round-ah hian team pahnih hi an inkhel ang a, a chak zawk zawkin inter-confederation playoff match an khel ve leh thung dawn a ni.

India hmabakte

Qatar

The Maroons tia hming lem an pek Qatar hi Asian football-a ram ṭhangduang ber pawl tiin a sawi theih a, Real Madrid leh Portugal boss hlui Carlos Queiroz-a enkawl an nih bawk avangin an tawh a khirh khawp ang. Asian Cup 2019-ah khan champion nomawi an chawi a, mahse, anmahni thlen World Cup 2022-ah last 16 an paltlang zo lo.

Asian champion nihpuitu Félix Sánchez-a contract chu World Cup zawh rual hian zoin, contract thar an ziahpui lo a, Queiroz an la lut. Mahse, Portuguese coach hian match ngaah vawi hnih chiah a la chakpui - India leh Qatar hi vawi thum an intawng tawh a, vawi khat ve ve chakin, vawi khat an in draw.

Kuwait

FIFA ranking-ah 137-na an ni mek a, mahse, a tak ramah chuan ranking aṭanga teh chi an ni lo tih chu India nena tun hnaia an match aṭangin a chiang. Kum 1982 khan World Cup lo khel ve tawhin, hemi hnuah hi chuan an khel leh tawh bik lo.

Kum 1976 khan Asian Cup-ah pahnihna niin, kum 1980-ah an champion a, kum 1984 khan pathumna an ni bawk. Tun hnaiah erawh beisei an phak lo a, Asian Cup hnuhnung pahnihah group stage chu an tawpna a ni. Rui Bento enkawl Kuwait leh India hi vawi nga an intawng tawh a, vawi hnih ve ve hnehna changin, vawi khat an in draw.

Afghanistan

FIFA ranking-a 157-na Afghanistan-in football khawvelah chhuan tur sawi tur an nei lo. World Cup an la khel ngai lo a, Asian Cup takngial pawh an la khel lo. Kuwaiti coach Abdullah Al Mutairi enkawlna hnuaiah an khel mek a, World Cup khelh la sawi chi an ni lo.

Afghanistan leh India hi vawi 11 an intawng tawh a, India-in vawi sarih hnehna changin, vawi thum an inhnehtawk a, vawi khat India hi an tlawm ve thung.

Mongolia

Japanese coach Ichiro Otsuka enkawl Mongolia hi FIFA ranking-ah pawh 183-na daih an ni a, India tan hneh harsa tur an niin a lang lo. Blue Tigers nen vawi khat chiah an la intawng chu chu June thlaa Hero Intercontinental Cup-a an inkhel kha niin, India hian 2-0 in hnehna an chang.

Slovak second division club Komarno tana khel Ganbayar Ganbold hi an player neih langsar chu a ni mai a, group stage-a India hmachhawn turin Afghanistan pawh hi an paltlang ang em, tih chu zawhna awm thei a ni.