GIG Motors I Day Football : Chanmari FC-in Aizawl FC an la tiat lo

GIG Motors I Day Football-ah tualchhung football club ṭha pahnih Chanmari FC leh Aizawl FC te ni hmasa berah an inhmachhawn nghal a, I League club-in 4-3 in hnehna an chang.

Chanmari FC hi I League-a AFC inpettling puitu K. Malsawmkima'n a enkawl a, inbuatsaihna ṭha an neih bawk avangin beiseina sang tak nei mah se Victor Lalbiakmawia enkawl Aizawl FC an hneh lo.

Mala hote tan hnualna tur a la awm lo a, chutihrualin point thum hmu tawh FC Venghnuai an hmachhawn lehnghal dawn avangin August 3, Ningania an inkhel tur hi thih leh dam inkar a ni tawh ang.

An intiat tawk

Aizawl FC an la kim lo a, I Day Football atan an la inpeih lo chungin position tinah Mizo player ṭha vek an chhawp chhuak thei a. Right back-ah erawh player thar S. Lalhrezuala'n training a zawm tlai avangin winger HK Lalhruaitluanga dah a ni thung.

Chanmari FC-in an striker thar Khawpuimawia bench-ah an dah a, hmel thar luhtir tam mah se junior emaw senior level-a Mizoram kawr ha tawh an ni fur. Mala hoten bul an ṭan ṭha a, AB-a ball vawrh luh chu Hruaitea'n tauh pha loin Lalthangliana ṭha taka a lakluh hnuah minute 10-na lekah goal hmahruai a khung.

Hei le, Rinzuala

Aizawl FC-in Chhinga Veng aṭangin Lalrinzuala an la lut a, Serchhip tlangval hi Bengaluru Reserve-a a awmpui ṭhin K. Lalrinfela te nen an inthlawp ṭha nghal hle.

Rinzuala hian minute 13-naah Hruaitea thawhrah sengin a pet goal a, minute 25-naah Mafela cross ball chu a tauh lut leh bawk. Club thar tan Rinzuala hian hattrick siamna ta lo mah se, AFC goal li khungah a inrawlh vek.

A goal belh

Second half-ah Khawpuimawia (Mapuia) a rawn lut a, Kelkang tlangval hian Lalnuntluanga corner pet chu minute 65-naah a tauh lut. Chanmariin siphurh an sut a, Aizawl FC tlarhnung marking a ṭha lo.

Minute thum hnuah AFC-in hma a hruai leh tho a, Rinzuala ball vawrh luh chu Mafela'n um lutin box pawn aṭangin goal ban perin a pet goal. Substitute Augustine Lalrochana'n Aizawl FC goal lina minute 82-naah a khung a, awlsam taka chak tura ngaih an ni.

Mahse, injury time-ah goalkeeper Vanlalhriatpuia leh defender Rohmingthanga te an inring thul a, AFC defender Rohminga hian an lamah a tauh lut hman. Chanmariin a hun tlem an neih an hmang ṭangkai lo a, Aizawl FC 4-3 in an chak.