TNT leh Valbuanga zinkawng ngaihnawm

Mi ṭhenkhat chuan pianpui thiamna an nei a, an naupan tet lai aṭanga an kawngzawh tur thlang fel nghal pawh an awm - ṭhenkhat erawhin an talent haichhuahsaktu an mamawh a, kawng kawhhmuh theitu an ngai ṭhin.

Hlawhtlina kalkawng leh kawng zawh a inang vek lo - Thutak Nunpuitu Team (TNT) leh Vanlalṭanchhana (Valbuanga) te pawh hi piantirh aṭanga inzawm nghal ni bik lo mah se, rawlthar a nih hnua an intawnna chu a tlai chuang lo a ni.

Kawnpui tlangval

Zalawra leh Rorelmawii ten fa paruk an nei a, an zinga naupang ber dawt ni turin Vanlalṭanchhana hi a lo piang a, naupang ṭhangduang tak ni mah se a zakzum tlat. A tan mi zinga volleyball va khelh ve bawrh bawrh kha zahthlak a tling tlat.

Vanglaini zahna chhangin Valbuanga chuan, "Volleyball hi naupangte ka nih lai aṭangin ka hmelhriat a, mahse ka khel nghal mai lem lo. Kan khua Kawnpuiah hian coach Lalchhanchhuaha a awm a, ani chuan inkhel turin min sawm ve ṭhin.

"Mahse, a tirah chuan ka zak a, min sawm chhan tak kha chu ka san vang a ni ber a. Zawi zawiin volleyball ka khel chho ve ta zeuh zeuh a, kum 18 ka tlin kha chuan infiamna dang aiah volleyball ka thlang fel a, ka inpumpek ta a ni," tiin a sawi.

Valbuanga hi 6ft 2in a sang a ni - Mizo pa vangtlang chunglam a ni a, sang viau mah se a taksa a vawngin a inkhaithli ṭha, tunah hian 80kg a rit a ni. A san bakah a zuan san tel avangin a duh tawkin a hlap (spike) thei ṭhin.

Hello TNT

Kawnpui khua a ni a, Aizawl khawpuia veng pakhat Muanna Venga awm Thutak Nunpuitu Team (TNT) chanchin hriain, hnuchhamte chenna hmun a nih bakah volleyball khelhna hmunpui a ni tih a hre tel bawk.

Kum 2020 August thla khan Valbuanga hian TNT a luhchilh a, a thil tum leh duhthusam ti hlawhtling turin volleyball chu a khel ta ngat ngat mai a ni. Hlawhtlinna erawh awlsam taka chan mai theih a ni nghal bik lo, a nghah ve phawt a ngai.

Season hmasa khan a vawi khat nan Pro Volleyball League a khel. PVL an khelh dawnah hian Indian Junior camp lama awm tura kohna a dawng a, mahse a kal lo. Valbuanga chuan, "Lehkha kan dawn tuk kha kal ni tur a ni nghal a, hun a chawpchilh lutuk.

"Chubakah, ka inzirna TNT tana PVL khelh kha ka thil tum hmasa a ni a, hun a tepter tawh nen ka tan chuan tualchhung volleyball inelna sang khelh mai kha a ṭha zawk," tiin a sawi a, a season khatnaah hian final luh pui mah se an champion lo thung.

Hlawhtlinna

PVL final-ah an chak lo a, an tum chu a hlawhtling lo phawt. Mahse, beidawng loin kum khat chhung an inbuatsaih chhunzawm. PVL 2023 a herchhuah meuh chuan Mizo player hlanga khel awmchhun an ni a, an champion zui.

Hlawhtlinna an chan theih nan hian Valbuanga'n a thawhhlawk takzet - Best Spikers lawmman bakah KT Enterprise Mizo Best Player chawimawina a dawng bawk a, hetiang chawimawina sang pahnih dawng kawp thei hmasa ber a ni.

Valbuanga chuan, "Keimah thawhchhuah a ni bik lo, team thawhrimna vang chauh a ni. Mi vuak tur lo dan te, service leh a set-tu thlengin kan pawimawh vek, ṭha taka kan hlap theih nen chuan ball ṭha kan hmuh a ngai hmasa.

"Chuvangin team thawhhona a ni a, ka khelh pui zingah pawh khelhpui nuam tih leh thiam tih fal bik ka nei chuang lo, kan zavai khan kan pawimawh dan a inang vek mai a ni," tiin Vanglaini a hrilh a, thawhhona ṭha pawimawh zia a sawi bawk.

A ngaiah bawk

Tualchhung volleyball inelna lian leh ngaihhlut ber Pro Volleyball League hi kum 2018 aṭang khan khelh ṭan a ni a, hripui leng vanga khaihlak zeuh chu awm mah se season dangah chuan a hun pangngaiah khelh ṭhin a ni.

Ruahman dan chuan season tharah pawh a awm leh ang. Tualchhung player ṭha hlangin a champion theih a ni tih a takin kan hmu tawh, player ṭha an inchuh nasa dawn - Valbuanga chuan TNT tana khelh chhunzawm a tum.

Kawnpui tlangval Valbuanga chuan, "Season thar chu TNT-ah bawk ka khel ang, ka inzirchhuahna leh ka nuna hmun pawimawh tak luahtu a ni," tiin Vanglaini a hrilh. Muanna Veng team hi a zawna champion pui a tum dawn a ni.

Social media lamah Valbuanga hian sum tak tak hlawh turin club dang aṭanga sawmna dawng angin thu a darh, hei erawh amah Valbuanga hian a hriatpui ve loh thu a sawi a, tun thleng chuan sawmtu a nei lo tih a sawi - sawm ngam loh khawpin a nghet.

Malsawmna

TNT-ah hian volleyball a khelh a ni satliah lo, councilor a nih bakah Sunday Sikul (Junior department) zirtirtu a ni. Infiamna piah lamah khawngaih rawngbawl hna a thawk tel tihna a ni a, hei bakah hian a graduate hnuah coumpter a zir chhunzawm mek.

Valbuanga chuan, "Theihtawp chhuahin rawng kan bawl ve a, tling lo tak chunga kan thil tihte miin an lo hre ve ṭhin a, chumi avang chuan Pathian malsawmna pawh kawng hrang hrangin ka dawng nasa takzet a ni.

"Mimal phei chu an tam em avangin sawi vek sen a ni lo. Engkim mai hi Pathian vanga kan dawn leh amah avang lo awm a ni a, chuvangin ka tan chuan Pathian fak mai loh chu tih tur dang a awm chuang lo," tiin rawngbawl hna a ngaih pawimawh thu a sawi bawk.

TNT-ah hian zing leh tlai bakah zanah pawh volleyball a khelh theih. Volleyball ngaina leh khel nasa an nih avangin an thisenin a ṭhanhnan - Valbuanga chauh lo pawh hi hming langsar leh lian tak tak an rawn chhuak zel a nih pawhin a mak lo ang.