I Day Football Fixtures: Group khatah Police, Chhinga Veng leh Chawnpui

Mizoram Football Association chuan nimin khan I Day Football fixtures an tichhuak a, champion lai Mizoram Police chu MPL champion Chawnpui leh coach Lalsangzuala Hmar enkawl Chhinga Veng te nen group khatah an dah. Group B-ah hian MPL kai thar Project Veng FC an awm bawk.

MFA buatsaih I Day Football-ah hian MPL club pariat an inel dawn a, heng club pahnih te hi group pahnihah an ṭhendarh. Group A-ah Aizawl FC, FC Venghnuai, Electric Veng FC leh Chanmari FC te an awm bawk.

Inelna hi RG Stadium-ah July 31, Thawhṭanni aṭangin khelh ṭan a ni dawn a, group stage khelh nan hian Muallungthu Ground an hmang bawk ang.

Mizoram Police hi I Day Football champion an nih bakah season liam ta khan All India Mizoram Police Meet-ah a vawi khat nan an champion. Police hian champion nawn an tum dawn a, champion nawn erawh a harsa dawn.

Police hi MPL champion Chawnpui FC leh Chhinga Veng nen group khata an awm avangin group stage paltlang pawh a harsa dawn. Chawnpui FC hi coach Lalrindika Hmar-in a enkawl a, FC Venghnuaia a player ṭha tam zawk a seng lut.

MPL-a coach champion ngun ber Lalsangzuala Hmar-in Chhinga Veng a zawm a, Sanga vang ringawt pawh hian Chhingcows hi champion rinkai zingah an tel nghal. MPL club thar Project Veng FC tan point hmuh a har dawn.

Group A-ah Aizawl FC an awm a, nikum khan group stage-ah chungnung viau mah se final-ah Police lakah an chesual. I League club elpui turin Chanmari FC an awm a, coach K. Malsawmkima hote hian training an nei hma - player an neih ṭhat bawk avangin en an châkawm tawh hle.

Electric Veng FC hi Aizawl South FA nen an inthlunzawm a, engtiang chiaha ṭha tur nge an ni tih hriatthiam a har. FC Venghnuai hian season liam ta khan MPL-ah final an thleng a, coach Rindika'n player a chhuahpui nual avangin season liam ta chu an pha lo tura ngaih an ni bawk.

MFA hian mipa fixtures a tihchhuah rual hian veteran leh hmeichhe I Day Fotball fixtures a tichhuak nghal. Hmeichhe inelnaah hian team paruk Govt T. Romana College, Govt Hrangbana College, Govt Aizawl North College, Mizoram U-17 Girls, Pachhunga University College leh Govt Aizawl College te an inel dawn a, vawi khat ṭheuh an inkhelh chhuah hnuah a sang pahnihin final an lut ang.

Veteran Football-ah hian team 18 an tel a, knockout hmangin inelna hi neih a ni dawn. Inelna hi Muallungthu Ground-ah khelh a ni dawn a, semifinal leh final hi RG Stadium-ah khelh tur a ni.