Bayern-in goal 27 an khung

German champion Bayern Munich chuan German club tenau Rottach-Egern chu season thar atana inpuahchah nan Thawhlehni khan an hmachhawn a, 27-0 in an sawp.

Rottach-Egern hi German league-ah division pakuanaa khel an ni a, club pahnih inkar a zauh avangin goal a lut tam pawh hi a mak lo. Bavarians coach Thomas Tuchel chuan, "27-0 in kan chak a, kan result-ah ka la lawm lo. Goal tam zawk kan khung thei a, second half-ah kan khel ṭha tawk lo," tiin a sawi.

Bayern hian kum 2019 pawh khan Rottach-Egern hi friendly match-ah 23-0 in an hneh tawh a, kum 2018-ah 20-2 in an hneh bawk. Vawi thum an inhmachhawnah hian Bayern hi aggregate-ah 70-2 ngawtin an chak.

Jamal Musiala, Mathys Tel leh Marcel Sabitzer ten goal nga vek an khung a, Serge Gnabry-a'n hattrick a siam bawk. Alphonso Davies, Konrad Laimer, Noussair Mazraoui, Dayot Upamecano, Leroy Sane, Raphael Guerreiro, Ryan Gravenberch, Kingsley Coman leh Sadio Mane ten goal ṭheuh an khung bawk a, Bayern-in inkhel an thunun hle.

Bayern hian goal khung ṭeuh mah se an lawm a kim lo. Liverpool aṭanga an lakluh Sadio Mane-a'n hun tawp dawnah goal khung mah se a che ṭha lo a, nipui bazara chhuak thei dinhmunah a la ding zel.