India mawina Lianzuala: Treble champion Blue Tigers
Sree Kanteerava Stadium, Bengaluru-a mipui 20,000 chuang pungkhawm hmaah Mizo tlangval Lallianzuala Chhangtein van lam hawia kawkin lawmthu a sawi a, goal a khung vang a ni.
Thawhṭanni zan khan SAFF Championship final-ah India leh Kuwait chu 1-1 in an inhnehtawk. Minute 120 chhunga chak zawk an awm theih loh avangin penalty hmanga chinfel a ni a, pet goaltu zingah Lunglei tlangval a tel - a pet ṭha takzet. A tawpah Blue Tigers hi 5-4 in an chak a, SAFF champion an ni leh ta. AIFF pawhin player of the year atana Lianzuala Chhangte an thlang hi, tifuh an inti khawp ang.
Bengaluru khawpuia inkhelah Kuwait hian Shabaib Al-Khaldi hmangin goal an khung hmasa zawk a, India champion lai hmuh châka pungkhawm mipui thawm a reh hle. Mahse, Lianzuala a lo lang a, minute 38-naah si phurh sutna goal a khung.
Hun tawp thlenga goal dang a luh loh avangin penalty hmangin chak zawk chinfel a ni a, India keeper ṭha mi Gurpreet Singh Sandhu chuan Khalid El Ebrahim-a pet chu dansakin India an chak - kum 2023-a nomawi pathum an chawina chiah a ni nghal bawk.
Boruak a 'hot'
India-in kuminah Hero tri-nation series leh Hero Intercontinental Cup an dawng tawh a, tun hnaia an khelh danah hmasawnna hmuh tur tam tak a awm tel bawk avangin Blue Tigers ṭantu fan-te an phur thar a, SAFF final boruak pawh a 'hot' hle.
Hei chauh a ni lo - Bengaluru-ah AIFF lamin General Body Meeting an neih bawk avangin Indian football-a thuneitu sangte pawh inkhel en turin an kim viau a, Mizoram Football Association honorary secretary Lalnghinglova Hmar pawh a hmuna inkhel en zingah a tel.
Blue Tigers beiseina a sang a, mahse, India-in goal an chhuah hma hle - minute 14-na lekah right back Abdullah Al-Bloushi-a siamsak chu ven loha awm Shabaib Al-Khaldi chuan hmahruaina goal ni turin a khung a, thawm chu reh tak a ni.
Mahse, India-in tha thlah loin na takin an nawr let nghal a, chance pawh an nei. Mahse, Sunil Chhetri shot ṭha zet Kuwait keeper Abdulrahman Marzouq-a dan per chu Lianzuala'n nang hman mah se a duh angin a pet hman lo a, India an vanduai.
Mamawh chhanna
Team pahnihin hma takah an player neih ṭhat ve ve an chân zui - Kuwait defender Hasan Al-Enezi leh India centre back ṭha Anwar Ali te chu chawlhlawk hmain hliam vangin lakchhuah ve ve an ni a, inkhel hmuhnawmna erawh a bo phah lo.
Minute 38-na a ni a, Lallianzuala Chhangte inlar hun a thleng. Ashique Kuruniyan-a ball pek chu Sunil Chhetri-a'n box lama tlan lut Sahal Abdul Samad tan a siamsak a, ani hian Lianzuala tan a siamsak ve leh.
Lunglei tlangval tan goal khung harsa a ni tawh lo - a hmaa goal ruak zau takah a chhuih lut a, Sree Kanteerava Stadium a chim mai dawn em ni, tih tur khawpin mipui thawm a ṭha.
Hetihlai hian Lianzuala erawh ṭhingṭhiin van lam a kawk a, tun dinhmun thlentu chung lama mi chu a hre reng - goal dang lut loin chawlhlawk hman a ni a, 1-1 a nih avangin inkhel a la hmuhnawm dawn chauh tih a chiang.
Lianzuala vanglai
AIFF Player of the Year-a thlan hlim Lallianzuala'n a vanglai tak tak a tawng a, Bengaluru khawpuia inkhelah pawh Mizo tlangval hi player hmuhnawm bik tia chhal ngam a ni - a tlan chak a, a taima a, a che rang a, goal khung châkin a tuihal reng tih hmuh turin a awm.
Lunglei forward hian second half-ah pawh Kuwait tlarhnung a chhaih mangang fo a, chance a neih nawn piahlamah a ṭhiante tan hun duhawm a siamsak ṭhin bawk. Mahse, India vanneih zan a ni lo em ni chu aw, tih turin goal hmaah an vannei tawk lo.
Lianzuala hian Chhetri siamsak hmangin khung belhna remchang nei mah se a chhawr lo a, Chhetri hian Mizo tlangval siamsak chu goal-ah a chantir thei bik lo - Lianzuala'n hun tawp dawna a chance neih a khung loh pawh uiawm a tling.
India tan goalkeeper Gurpreet chu fak tlak a ni. Punjabi keeper pasang hian hun hlauhawmah save ṭha tak a nei leh ṭhin a, Blue Tigers-in hun tawp thlenga goal dang an chhuah loh chhan langsar a ni.
-------------------
Penalty 'hero' Gurpreet
Minute 120 chhunga team pahnih 1-1 a an inhnehtawk avangin penalty hmanga a chak zawk chinfel a ni a, a tawpah Gurpreet Singh Sandhu penalty dan hmangin India an chak hram - a vawi kua nan SAFF Championship-ah India an champion.
Sunil Chhetri (India): India tan captain Sunil Chhetri a lo pen chhuak a, Bengaluru striker pet hian goal ban perin a pet lut. Keeper a bum bakah goal chiang mah se India ṭantute thinphu erawh a tirang khawp ang.
Mohammad D KH Abdullah (Kuwait): India-in an pet goal hnuah Kuwait tan Abdullah a lo pen chhuak a, chiang zeta bar a pet per avangin India fan-te tan lawmna a siam.
Sandesh Jhingan (India): Blue Tigers tan defender rinrawl Sandesh Jhingan a lo pen chhuak a, defender tawnhriat nei ṭha hian goal-a chantir turin harsatna a tawk lo. Kuwait keeper a dive sual zel.
Fawaz Al Otaibi (Kuwait): Kuwait-in a vawi hnihnaah chuan an hlah tawh bik lo a, Fawaz Al Otaibi-a'n a chhuih goal.
Lallianzuala Chhangte (India): AIFF Player of the Year-a thlan hlim Lallianzuala Chhangte a lo pen chhuak a, Kuwait goalkeeper a dinglamah ṭum hnih a dive tawh avangin Mizo tlangval hmabak hi a harsa. Mumbai forward hian Chhetri leh Jhingan te petna lamah tho a pet a, Kuwait keeper a ngaiah bawk a dive - Lianzuala'n a bum chiang a, a goal chiang bawk.
Ahmed Al-Dhefiri (Kuwait): Kuwait tan Ahmed Al-Dhefiri-a'n a khung ve leh - GSS-a'n a petna lam ring dik mah se a dang thei lo a, Kuwait beiseina a nung.
Udanta Singh (India): India tan Udanta Singh a lo pen chhuak a, semifinal-a Lebanon laka khungtu hian crossbar chung lamah a thlawh a, Kuwait an phur lehzual.
Abdul Aziz Mahran (Kuwait): GSS-a'n Kuwait player-te ball petna ring dik ṭhin mah se a dang thei lo a, Abdul Aziz Mahran-a'n a pet goal. 3-3 a ni chiah.
Subhasish Bose (India): Mohun Bagan full back Subhasish Bose a lo pen chhuak a, goal chung kilah chiang zetin a thlawh lut a, Kuwait keeper dive dik mah se a tan tih theih a awm lo.
Shabaib Al-Khaldi (Kuwait): Kuwait tan forwar Shabaib Al-Khaldi hun a inher chhuak a, kum 24 mi forward hian goal ding lam kilah lei hrulin a pet goal.
Mahesh Singh (India): Player panga ve vein an pet hnuah pawh 4-4 a an la inhnehtawk avangin India tan Mahesh Singh a lo pen chhuak a, game boruak sanga tawnhriat la ngah lo defender hian a pet goal chiang takzet.
Khalid El Ebrahim (Kuwait): Mikhual team tan captain Khalid El Ebrahim a lo pen chhuak a, kum 30 mi defender hian pet ṭha pangngai viau mah se Gurpreet Singh Sandhu chuan ṭha zetin a lo dansak a, India-in penalty-ah 5-4 in hnehna an chang.
-------------------
Sunil Chhetri a thiam ber
SAFF Championship Most Valuable Player atan Sunil Chhetri thlan a ni a, India captain hi top scorer a ni bawk - tun inelnaah match nga khelin goal nga a khung a, heng zinga goal hnih erawh penalty aṭanga a chhuih luh a ni.
Kum 38 mi Chhetri hian Pakistan lakah hattrick a siam a, Nepal leh Kuwait lakah goal khat ve ve a khung a, semifinal leh final-ah erawh goal a khung tawh lo thung.
India captain hian ram tan match 142 khelin goal 92 ngawt a khung a, ram tana goal khung hnem lamah Cristiano Ronaldo (123 goals), Ali Daei (109) leh Lionel Messi (103) chiah a phak lo tawh a, a record hi uanpui tham a ni.
Hetihlai hian goalkeeper ṭha berah Bangladesh keeper Anisur Rahman Zico chu thlan a ni a, kum 25 mi keeper hi an ram club Bashundhara Kings tana khel lai niin, tun inelnaah khan match li khelin goal nga a chhuah.
Group stage paltlang zo ta lo Nepal hnenah Fair Play Award hlan a ni thung a ni.
-------------------
Sakhming chul lo tur Leitlangpui tlangval Lianzuala
AIFF Player of the Year Lallianzuala Chhangtein kuminah India tan inelna pathum a hmachhawn a, player pawimawh ni chungin champion nomawi a chawi vek.
Lianzuala tan SAFF nomawi hian danglamna bik tak a nei - kum 2015 khan a lo champion tawh a, hei hi India senior team squad-a a awm hmasak ber a ni a, khatihlai khan professional footballer pawh la ni loin DSK Shivajians academy-a a la inzir lai a ni.
Mahse, hetihlaia India coach Stephen Constantine chuan Mizo rawlthar hian theihna sang tak a nei tih hriain ram tan a ko a, 2-0 a Sri Lanka an hnehna inkhelah luhtir niin, ram tana a match hmasa ber a khel.
December 27, 2015-ah Lianzuala hian India tana a goal hmasa ber a khung zui a, hemi ṭumah pawh hian bench aṭang thoa luhtir niin, Nepal lakah goal mawi bik pahnih a khung - Indian media-te ngaihven a hlawh nghal hle.
SAFF 2015-ah hian India hi an champion a, he squad-ah hian hetihlaia Bengaluru fullback Lalchhuanmawia Fanai leh Chennaiyin striker Jeje Lalpekhlua te pawh squad-ah an tel a, Jeje hian semifinal leh final-ah goal a khung nghe nghe.
Kuminah professional football-a a champion-na hmasa ber SAFF inelnaah bawk Lianzuala a vul leh ta a, Mizo forward hian final-a goal pawimawh tak a khung piahlamah, inelna neih chhung zawngin a khel ṭha ṭhin hle.
Hero tri-nation series-ah pawh player of the tournament a ni a, Hero intercontinental cup final-ah goal leh assist a nei bawk - final-ah hian hero of the match atan thlan a ni hial.
Lunglei forward hian ram tan match 28 khel tawhin goal sarih a khung a, assist vawi khat a nei bawk - ram tan khel zel se, goal pawh khung belh zel se, tih hi Mizo mipui tam zawkin kan duhsakna a ni ngei ang.
-------------------
Eng zat nge sum an dawn?
SAFF Championship-ah India-in match nga an khel a, group stage-ah Pakistan leh Nepal hnehin, final-a an hneh tak Kuwait nen hian 1-1 in an lo inhnehtawk tawh bawk.
Semifinal-ah Lebanon nen 0-0 in an inhnehtawk a, mahse, penalty hmangin 4-2 in India an tlang. Final-ah Kuwait nen hun pangngaiah 1-1 in an inhnehtawk leh a, penalty hmang bawka hnehna changin an champion.
Blue Tigers hian champion lawmmanah $50,000 an dawng a, hei hi India pawisa chuan Rs. 41,11,825 a ni. Kuwait-in an champion zawh loh avangin $25,000 an dawng thung a, India pawisa chuan Rs. 20,55,912 a ni thung.