India ramah Lianzuala aia thiam zawk an awm lo; AIFF Player of the Year Lallianzuala Chhangte
"Pathian malsawmna ka dawn a ni," a ti zet a, chutiang award ropui a dawng chu a awih lo leh deuh a ni ang, "I chiang tiraw?" an ti leh a, a hamhaih vek a ni ber e.
Nimin khan Bengaluru khawpuiah AIFF General Body Meeting neih a ni a, he hunah hian Mizo tlangval Lallianzuala Chhangte chu AIFF Footballer of the Year atan thlan a ni.
I chhiar dik e, awih ngam lo, awih lo phal loin awm mah la, kan dem lo che - India ram zauzia, mihring tamzia, inkhel tamzia hi kan hria. Chung zinga player ṭha ber nih chu thil namai a ni lo a, Mizo tlangval Lallianzuala Chhangte chuan a tithei lawi si!
Kan sawi ang a, kan sawi nawn leh dawn - theih ni se, a thunawn awm se, kan va ti em! Mizo tlangval Lallianzuala Chhangte chu AIFF Player of the Year atan thlan a ni a, Mizo zingah Jeje Lalpekhlua hnua dawng leh hmasa ber a ni.
Aw, beiseina!
Kum 2016 khan AIFF Player of the Year-ah Jeje Lalpekhlua chu thlan a ni a, Mizoin kan dawn ve tura kan beisei phak loh kha a dawn ve theih a ni tih a pholang a, Mizo Sniper-in Mizote tan kawng a hawnsak.
Mahse, ram khat meuha player ṭha ber atana thlan nih chu a sang êm a, Mizo footballer-in engtikah nge he award hi an dawn leh ang, tih chu rilruin a inzawt a, beisei deuh, beisei ngam si loin kan awm a, khup hliam vanga duh aia hmaa Jeje a chawlh zui a ngaih avangin beiseina a thamral titih.
Mahse, chutiang boruak karah chuan tlangval pakhat a lo lang a, a hming chu Lallianzuala Chhangte a ni. Indian player-te dawn ve phaka kan ngaih ngai lo ISL Hero of the League (2022-23) atan thlan a ni a, Indian player zingah Sunil Chhetri tih loha dawng thei awmchhun a ni.
Mizo tlangval ropuinain kianzai a rel mai lo. July a her chhuak a, AIFF Player of the Year atan thlan a ni leh ta - Indian football ngainatute u, beng lo chhi ula, lo ngaithla rawh u. Mizo tlangval a lo kal e!
A hun têa rah ṭhin
December 2015-a Nepal laka goal mawi zet a khung ṭum khan Indian football ngainatute chuan Lianzuala lam hi ring fan âwk âwk chungin an lo thlir tawh a, a hunah tak Mizo tlangval a rawn par chhuak ta.
Lianzuala chuan, "Pathian malsawmna niin ka hria, min en ula, kei chu heti ve mai hi ka ni. Zep tur pawh a awm lo - ka pian a lian tawk lo a, ka sang ṭha tawk lo a, mi aiin ka tan hian chance a chhe zawk. Mahse, Pathian khawngaihna ka dawng a ni," tiin Vanglaini a hrilh.
Vanglaini in Lianzuala a biak pawhin official taka AIFF Player of the Year a nihna puanzar a la ni lo a, Lunglei tlangval hian a awih ngam lo - mahse, a tak tak a ni a, Indian footballer ṭha berah thlan a ni.
Lianzuala chuan, "Season ka hman dante thlir chuan ka beisei ve deuh tho a, mahse, a zawng zawnga va beisei ngam chu harsa tak a ni. Ka bul ṭannate ka ngaihtuah a, tun dinhmun ka thleng ta mai hi chu a mak a ni," a ti a, a lawm tih hai rual a ni lo.
Chhungte hmangaihna
Mizo tlangvalin award a dawn ruala a rilrua lo lang hmasa chu a chhungte an ni a, anni awm lo se, tun dinhmun a thleng dawn lo tihah hian a chiang - thawnthu hlui a chhui kir a, Lunglei tlangval lung a leng.
Lianzuala chuan, "Subroto khel tura ka inbuatsaih laite ka mitthla a, ka pain ka bag min ahsak a, ni sen sa hnuaia kan inzui hnak hnak laite kha ngaihtuah let loh hi harsa ka ti.
"Ka tana ka chhungte inpekna hi sawi hmaih a thiang lo. Taksa inenkawl uluk a ṭul a, chawlh lai pawhin an ei ang ka ei ve ngawt thei lo a, ni khatah vawi ruk vawi nga eirawng min bawlsak a ṭul chang a awm a, ka tan an inpe êm êm a ni," a ti a, a hlawhtlinna chu chhungkaw thawhchhuah a nih thu Vanglaini a hrilh.
Lianzuala chuan a khelhpuite pawh hre rengin, "Ṭhianten min duhsak êm êm a, ka inkhelhpui ka ṭhiante vangin he award hi ka dawng a ni, tih ka hria a ni," a ti a, chawimawina chu mimala hlawhchhuah theih a nih loh thu a sawi.
Thawhrimna rah
Lianzuala chuan, "Hun rei tak chhung he chawimawina hi ka lo beisei ve tawh ṭhin. Ka duh angin a kalkawng erawh a awlsam bik lo a, mimal chawimawina dawng tura ka inngaih ṭuma dawn loh pawh ka nei.
"Mahse, a hun takah Pathian a che a, ka tih ve hram hram rah chu ka seng ve taah ka ngai a ni," a ti a, chawimawina dawn chu a ler aṭanga thlir chi a nih loh thu a sawi - a kalkawngah hling tam tak a awm.
Lianzuala chuan sawi zawmin, "Season chawlh lai pawhin theihtawp chhuahin ka bei reng ṭhin a, Sir Muankima'n nasa takin min pui ṭhin - ani hnenah pawh lawmthu ka sawi a ni," a ti a, amah puitute a hre reng.
Indian football-a mimal chawimawina ngaihhlut hlawh zawng zawng chu Mizo tlangval kutah a awm vek a, a chanchinin titi a luah a, Indian football ngainatuten Lianzuala hming an lam bang thei lo.
Sulhnu
Lianzuala hian season hman zawh takah khan ISL match 22 khela goal 10 khungin assist vawi ruk a nei a, ISL Hero of the League-ah thlan a ni - ISL hma hian Durand Cup-ah match sarih khela goal sarih khungin, top scorer a ni bawk.
Hero Super Cup-ah Lianzuala hian match thum khelin goal khat a khung a, season hman zawh takah khan inelna hrang hranga match 32 khela goal 18 khungin assist vawi kua a nei - a record hi ropui tak a ni.
International break-ah India tan feh chhuak zuiin, Hero-tri nation series-ah Player of the Tournament atan thlan a ni leh a, Hero Intercontinental Cup final-ah Lebanon 2-0 a an hneh ṭumin goal leh assist a nei a, Hero of the Match atan thlan a ni bawk.
Nizan khan Lianzuala hian India jersey hain SAFF Championship final-ah Kuwait a hmachhawn a, he thu buatsaih a nih lai hian result kan hre hman lo - a tan chuan season chhinchhiah tlak bik a ni.
Chawimawina dawngtute :
AIFF Player of the Year
Mipa - Lallianzuala Chhangte
Hmeichhia - Manisha Kalyan
AIFF Coach of the Year
Mipa - Clifford Miranda
Hmeichhia - Priya PV
Emerging Player of the Year
Mipa - Akash Mishra
Hmeichhia - Shilji Shaji
---------------------------
Lallianzuala Chhangte
Mizo footballer hlawhtling an sawi apianga sawi hmaih tawh loh tur Lallianzuala Chhangte chanchinah hian ṭhangthar chauh ni loin kum upa zawkte tan pawh inzirna tur a awm. LZ Chhangte hi feet nga leh inches ruk leka sang a ni a, heti chung hian AIFF Player of the Year atan thlan a ni a, Indian rama footballer ṭha ber tihna a ni.
Mumbai City tana khel Lianzuala'n season khata a hlawh zat hi nuai 200 aiin a tlem dawn lo a, a nuam tihna ber football hmangin sum a hui lut. Lunglei tlangval Lianzuala hi CVL Hriatpuia leh Lalroliani te fa pali zinga pathumna a ni a, u pahnih C. Lalngaihzuala leh C. Lalnunhlima te a nei a, a nau CVL Remtluanga hi ISL club-a khelpha a ni bawk.
Lianzuala hian hlawhtlinna a chan theih nan nun dan phung leh pawm dan fel fai tak a nei a, ama ṭawngka ngei hian dah ila, chhiar a nuam zawk ang.
Lianzuala thukhawchang chu...
Thil ngaih pawimawh panga ka nei a, a pawimawh ber chu 'Pathian ṭih' hi a ni. Pathian tana kan danglam ngam chuan kan tan Pathianin a danglamna min hmuhtir ṭhin. Footballer chu ring lo mite zingah kan cheng a, kan nun a zalen a, kan nunin a keng telah kan ngai mai ṭhin. Amaherawhchu Pathian duh zawnga kan nun a ṭul a ni.
Pahnihna chu 'Nu leh Pa chawimawi' a ni. Bible-ah pawh a pawimawhzia kan hmu a, dam reina a nihzia pawh chiang takin a inziak. Hnamdang te hlawhtlin chhan hi ka ngaihtuah ṭhin a, nu leh pa thu an awih vang hi a nih ka ring hial. Hnam ka kawm phak chin chuan Nu leh Pa an zah a, malsawmna an dawn phahin ka hria. Mizo zingah nu leh pa zahna chang hre lo an awm a, hemi kawnga hian hma kan sawn a ṭul a ni.
Pathumna chu 'insumtheihna' a ni. Lehkhabu ka chhiar pakhatah chuan insumtheihna hi khawvel hnehna a ti hial. Hemi chungchang hian hmasawnna tur kei ngei pawhin hmasawnna tur hi ka la ngah hle.
Palina chu 'tum mumal tak neih' a ni. Hlawhtling tur chuan tum mumal tak neiha chumi tura thawhrim a pawimawh. Pathianin talent min pe vek a, chumi chu kan zawn chhuah a, kan pei pung a ngai. Talent neih ringawtin sang tak a thlen theih lo a, thawhrim tel a ṭul a ni.
A tawp berah chuan 'beidawn lohna' a ni. Ṭhenkhat chu vawi hnih khat kan hlawh chham a, ka tluang dawn lo tiin kan duhtawk a, thil dang kan ti kual leh mai ṭhin. Hlawh chham ṭum pawha beidawng loha beih hram hram hi hlawhtlinna atan a pawimawh hle. Mi hlawhtling ber berte hi hlawhchham nasa ber ber te hi an ni a, vawi hnih khat hlawh chham hnua beih leh hram hian hlawhtlinna hring chhuak ṭhin a ni.