Pro Volleyball League champion TNT An duh ber an nghak chhuak ta

Thutak Nunpuitu Team (TNT) chuan hun rei tak chhung nghakhlel takin an nghak a, chet fuh leh fuh loh karah pawh nghet takin an tum ram an pan, tunah zet chuan an duh ber Tata SK 712 Pro Volleyball League nomawi an chawi ta.

R. Dengṭhuama Indoor Stadium, Mualpuiah final hmuhnawm bik chhawpchhuah a ni, team ṭha pahnih inkhelah TNT hian Hunthar chu 3-2 (25-17, 20-25, 20-25, 27-25, 15-10) a hnehin an tum ram an thleng - TNT hi PVL champion thei team pangana an ni nghal bawk.

Coach Lalhmangaihsanga Sailo enkawl TNT hi Mizo tlangval hlanga khel an ni a, tualchhung volleyball inelna sang berah Mizo player hlanga champion thei hmasa ber an ni - league round aṭanga match hnuhnung ber thlengin an khingpui an hneh fai vek a ni.

TNT coach Lalhmangaihsanga Sailo hian PVL final a luhpui hmasak zawkah a champion pui mai lo, kuminah erawh team boruak nung leh ropui tak siam chhuakin a phu ang ngeiin 'KT Enterprise Best Coach' atan an thlang.

A hmuhnawm

Final khelh hmain TNT leh Hunthar team enkawltuten champion an tum thu Vanglaini an hrilh ve ve a, an tum ang ngeiin mipui tan 'Dream Final' an khel chhuak, set hnuhnung ber thlengin champion tur inum boruak a nung hle.

Thawm nei lian TNT lamin set khatna chu harsa vak loin an la mai, league round lamah Hunthar hi an hneh tawh bawk avangin Muanna Veng dinhmun a ṭhain entu mipui thawm pawh a ṭha rem rem hle - Mualpui boruak chu pui tak a ni.

Mahse, tawnhriat nei ṭha Huntharin nawr letin Punjab tlangval Gagandeep Singh leh Zomuansanga bakah Lalruatfela Sailo chuan kawng rawn sat êngin, a zawnin set an rawn la - a tir lama boruak ṭha êm êm TNT kha dinhmun hnufual zawkah an ding leh daih!

PVL season hmasa zawkah TNT hian Durtlang North an hneh lo, nikuma an player chawr ngaite bawk kuminah hian an chhawr. Final boruak sangah an buai leh dawn ni pawhin a lang hman, set khat lek pawh an tisual leh a nih chuan tlawm thei an ni.

A tawpah chuan

Set lina an khelh lai hian Hunthar aiin TNT ṭantu lam thinphu a rang zawkin a rinawm. Muanna Veng team hian 24-22 in hma an hruai a, point khat hmuh belh se set la mai tur an ni. Mahse, Lalnunfela leh Gagan-a'n vaw tla zawnin Huntharin an nih rual.

Vawi hnih deuce-in taksa bakah rilru a hah takzet, boruak san vanglai takin Valbuanga'n a rawn vaw tla a, 26-25-a an san laiin lehlam spiker Gagan chuan a hlap kai lo a, inkhel boruak a inthlak danglam ta dawrh.

Champion tur hriat nan set ngana khelh a ngai. Set hnuhnung berah a tir aṭangin TNT an che fuh a, point thuma an falna erawh Hunthar lamin an um phak. Amaherawhchu, TNT an che fuh laklawh, point hnuhnung ber phei chu K. Zodingliana service an la thei lo.

Vawi hnih champion tawh Hunthar lamin chak loh dan an thiam, an khingpui TNT lamin champion lawmman an lak dawn laiin zahna chibai an lo buk a, a hmuna entu leh TV lam aṭanga lo thlirtuten Hunthar chet dan an fak.

TNT an lawm

Pro Volleyball League awm tirh aṭangin TNT hi an la inlan char char, final an luh hmasakah Anastasia Electric Veng leh Durtlang North hneh loin a vanduai zawkah an ṭang, tunah erawh an hun a inherchhuak ve ta chu an lawm hle.

TNT assistant coach Lalzawmliana chuan, "Hei leh chen min hruaitu Pathian chungah kan lawm takzet, kan hotupa ber Dr. Sangthankima Sailo min uapna hnuaia hetiang dinhmun kan thleng thei hi kan lawm takzet.

"Mi hrang hrang hnen aṭangin khawngaihna leh duhsakna kan dawng hnem, ei leh in bakah sum leh pai leh lirthei thlengin min tumsaktu an awm. Kan champion hnu khan zan dar 1:00 velah Muanna Veng kan thleng phei thei chauh.

"Zan rei takah pawh vohbik leh ngawlveite nen kan zavaiin kan la hlim tlang êm êm vek a ni. Muanna Veng LC leh mipui ten min uap a, an chungah kan lawm. Heng bakah hian inelna buatsaihtu MVA chungah kan lawm takzet," tiin Vanglaini a hrilh.

TNT hian July 4, Thawhlehni hian an hmunpui Muanna Vengah an hlawhtlinna chan hi ruai nen an lawm dawn. Volleyball ngainatu leh tuichilhtu an ni a, an tan chuan tun ang baka lawmna sang tur dang hi a awm thei tawh bik chuang lo ang.

Hunthar hmathlir

Tualchhung volleyball inelna sang berah Hunthar hi vawi hnih an champion tawh, kum 2017 leh 2018 khan nomawi an chawi - lungthu kim thei chiah rih lo mah se anni chauh hi vawi khat aia tam champion thei an la ni.

Tun PVL-ah hian Hunthar Veng chhung player pasarih an nei thei a, coaching staff zawng zawng pawh an veng chhung mi leh sa vek an ni - a tawi zawnga sawi chuan Hunthar hi Mizoram volleyball hmunpui berte zinga mi a ni phak

Hunthar coach VL Malsawma Renthlei chuan, "Champion ngei tumin theihtawp kan chhuah a, nomawi chawi ta chiah lo mah ila, kan thlen chin leh ka naute khelh danah ka lawm, set lina tawp lamah a vanduai zawkah kan ṭang a ni.

"Tun hi kan tawpna tur a ni lo a, ṭha leh ropui zawka PVL khelh leh kan la tum ang. Kan player neih sate hi chelh chhunzawm kan duh a, chu bakah chuan kan ṭhat tawk lohna lai siamṭha turin inthuam chak kan tum bawk ang.

"A pumpuiah chuan champion phu leh a khel ṭha zawk TNT te an champion a, kan lawmpui hle a ni. Hunthar Veng chhung bakah pawn lam aṭanga min lo thlawptu zawng zawng chungah lawmthu ka sawi," tiin Vanglaini a hrilh.

Mimal Chawimawina

KT Enterprise Best Spiker: Vanlalṭanchhana, TNT

Vanlalṭanchhana hian Best Spiker lawmman bakah KT Enterprise Mizo Best Player chawimawina chu a dawng bawk a, hetiang chawimawina sang pahnih dawng kawp thei hmasa ber a ni.

Valbuanga hian match sarih a khelh aṭangin ṭum ruk ngawt Man of the Match lawmman a dawng thei a, tun inelna neih zawh takah khan TNT tan point 176 a thawk chhuak phak hial.

KT Enterprise Best Receiver: Lalramnghakdika Tlau, TNT

Point hlawhchhuah theih a pawimawh tluk zetin an khingpuiin an point neih tur lo dansak theih a pawimawh. TNT libero Lalramnghakdika Tlau hi 5ft 2in chauha sang a ni a, an team player zingah a hniam ber.

Mahse, a hnathawh tur chin a tlin takzet. Hmuntinah a lo awm hman zel emaw ni tih mai tur a ni, volleyball ngainatute chuan 'thla tawite a nei' tiin a chet ranzia leh a daihzaizia an sawi hial ṭhin a ni.

KT Enterprise Best Blocker: Zosangzuala (Mama), TNT

Zosangzuala hian a phu ang ngeiin Best Blocker chawimawina a dawng, kum hmasa lamah he chawimawina hi a lo dawng tawh a, a kum zawna award la thei hmasa ber a ni nghal bawk.

Kanan rawlthar hian a hna a tlin êm êm a, an khingpui lamin na leh hlauhawm tak taka an vuak thlak tur lo dansak chu a hna pui ber a ni ṭhin. Spiker ṭha tan pawh blocker ṭha hmachhawn hi a harsa ṭhin.

KT Enterprise Best Setter: Remsangzuala (Lalmama), Hunthar

A vaw tlatu an langsarin an pawimawh ṭhin a, chutiang bawkin an ball vuak tlak tur siamsaktu setter an pawimawh. Hunthar setter Remsangzuala (Lalmama) chuan a phu ang ngeiin a vawi hnih nan Best Setter chawimawina a dawng.

Hunthar captain Lalmama hi 5ft 10in-a sang a ni a, 2017 khan a team Hunthar champion pui chungin mimal chawimawina hi a lo dawng tawh bawk. Setter a nih bakah team-in a mamawh dan a zirin spiker atan pawh a hman theih.